સોનિયા ગાંધીને જ્યારે ડૉક્ટરોએ કહેલું કે સમય ગુમાવવાનું જરાય પોસાય એમ નથી

સંસ્મરણોમાં ખુલાસો કર્યો ૨૦૧૦ની બ્રેસ્ટ-કૅન્સરની સર્જરીનો, લખ્યું છે કે હું હચમચી ગઈ હતી અને ચિંતિત હતી

સોનિયા ગાંધી

સોનિયા ગાંધીએ તેમના સંસ્મરણ ‘બિલૉન્ગિંગ: અ જર્ની ઑફ લવ’માં ખુલાસો કર્યો છે કે ૨૦૧૦માં તેમણે બ્રેસ્ટ-કૅન્સરની સર્જરી કરાવી હતી. આ સંદર્ભમાં તેમણે લખ્યું હતું કે હું હચમચી ગઈ હતી અને ચિંતિત હતી.

સોનિયા ગાંધીએ પોતાના સ્વાસ્થ્ય વિશે જાહેરમાં બહુ ઓછી વાત કરી છે પણ તેમનાં સંસ્મરણોમાં તેમણે અવારનવાર થતી અસ્થમાની તકલીફ, અૅલર્જી અને પેટની સમસ્યાની વાત લખી છે. તેમને બ્રેસ્ટ-કૅન્સરનું નિદાન થયું એ પહેલાં તેમને સ્વાસ્થ્યને લગતી કોઈ ગંભીર સમસ્યા નહોતી. તેમણે એ બાબતનો પણ ઉલ્લેખ કર્યો છે કે કેવી રીતે જાહેર જીવન અને રાજકારણનાં દબાણોને કારણે તેમની પેટની તકલીફો વધુ વકરી હતી.
કૅન્સરનું નિદાન થયા બાદની ઘટનાનો ઉલ્લેખ કરતાં સોનિયા ગાંધીએ લખ્યું છે, ‘હું અંદરથી હચમચી ગઈ હતી અને ચિંતિત હતી; મને કહેવામાં આવ્યું કે જરાય સમય ગુમાવવો પોસાય એમ નથી અને મારા મનમાં સંભવિત ભયાનક પરિણામોના વિચારો દોડવા લાગ્યા હતા. મેં હંમેશાં મારી પર્સનલ બાબતોને ખાનગી રાખવાનો પ્રયાસ કર્યો હતો અને મારી બીમારી વિશે મીડિયામાં ચર્ચા થાય એ વિચાર જ મારા માટે પીડાદાયક હતો એટલું જ નહીં, અત્યંત ગુસ્સો અપાવનારો પણ હતો. સાચું કહું તો હું એક જાહેર વ્યક્તિ બની ગઈ હતી, પરંતુ શું એનો અર્થ એવો થાય કે મને જરા પણ પ્રાઇવસી ન મળવી જોઈએ?’