12 August, 2022 09:08 AM IST | New Delhi | Gujarati Mid-day Correspondent
નવી દિલ્હીમાં ગઈ કાલે વડા પ્રધાન નરેન્દ્ર મોદીને રાખડી બાંધી રહેલી પીએમઓના એક સ્ટાફ-મેમ્બરની દીકરી
દેશભરમાં ગઈ કાલે રક્ષાબંધનની ઉજવણી થઈ હતી ત્યારે વડા પ્રધાન નરેન્દ્ર મોદીએ પણ આ ઉત્સવનું સેલિબ્રેશન કર્યું હતું. તેમની ઑફિસમાં કામ કરતા સ્ટાફ-મેમ્બર્સની દીકરીઓએ તેમને રાખડી બાંધી હતી. વડા પ્રધાને તે દરેકને ‘હર ઘર તિરંગા’ કાર્યક્રમ માટે ત્રિરંગો આપ્યો હતો. વડા પ્રધાને આ ઉજવણીના ફોટોગ્રાફ્સ સોશ્યલ મીડિયા પર શૅર કરીને લખ્યું હતું કે ‘આ યંગસ્ટર્સની સાથે ખૂબ જ સ્પેશ્યલ રક્ષાબંધન.’
અધિકારીઓએ જણાવ્યું હતું કે વડા પ્રધાનની ઑફિસમાં કામ કરતા સફાઈ કર્મચારીઓ, પટાવાળા, માળી, ડ્રાઇવર્સ અને અન્ય સ્ટાફ-મેમ્બર્સની દીકરીઓએ મોદીને રાખડી બાંધી હતી. વડા પ્રધાને તેમની સાથે વાતચીત પણ કરી હતી.’
નોંધપાત્ર છે કે કેન્દ્ર સરકાર ભારતની આઝાદીની ૭૫મી જયંતીની ઉજવણી માટે ‘હર ઘર તિરંગા’ કૅમ્પેનના ભાગરૂપે ૧૩થી ૧૫ ઑગસ્ટ દરમ્યાન રાષ્ટ્રીય ધ્વજ ડિસ્પ્લે કે ફરકાવવા માટે લોકોને અપીલ કરી રહી છે.