24 February, 2026 06:22 PM IST | Keralam | Gujarati Mid-day Online Correspondent
મુખ્ય પ્રધાન પિનરાયી વિજય અને વડા પ્રધાન નરેન્દ્ર મોડી
કેન્દ્રીય મંત્રીમંડળે 24 ફેબ્રુઆરી, 2026, મંગળવારના રોજ ‘કેરળ’ રાજ્યનું નામ બદલીને ‘કેરલમ’ કરવાની મંજૂરી આપી છે, એમ કેન્દ્રીય મંત્રી અશ્વિની વૈષ્ણવે જણાવ્યું હતું. અગાઉ, 24 જૂન, 2024 ના રોજ, કેરળ વિધાનસભાએ સર્વાનુમતે કેન્દ્ર સરકારને રાજ્યનું નામ બદલીને વિનંતી કરતો ઠરાવ પસાર કર્યો હતો. આ ફેરફાર એપ્રિલ-મે 2026 માં યોજાનારી કેરળ વિધાનસભાની ચૂંટણી પહેલા કરવામાં આવ્યો છે.
કેન્દ્ર સરકારની મંજૂરી પછી, રાષ્ટ્રપતિ ‘કેરળ (નામમાં ફેરફાર) બિલ, 2026; રાજ્ય વિધાનસભાને તેના અભિપ્રાય માટે મોકલશે. ભારતીય બંધારણના અનુચ્છેદ 3 મુજબ, સંસદ રાજ્યનું નામ બદલવા માટે કાયદો બનાવી શકે છે. રાષ્ટ્રપતિ દ્વારા ભલામણ કરવામાં આવે તો જ બિલ સંસદમાં રજૂ કરી શકાય છે, અને જો દરખાસ્ત રાજ્યના પ્રદેશ, સીમાઓ અથવા નામને અસર કરે છે, તો રાષ્ટ્રપતિ તેને રાજ્ય વિધાનસભાને તેના મંતવ્યો માટે મોકલે છે.
કેરળ વિધાનસભાએ બીજી વખત આ ઠરાવ પસાર કર્યો. અગાઉ, 2023 માં, રાજ્ય સરકારે કેન્દ્ર સરકારને એક પ્રસ્તાવ મોકલ્યો હતો, પરંતુ ગૃહ મંત્રાલયે ટૅકનિકલ કારણોસર કેટલાક ફેરફારો સાથે ફરીથી રજૂ કરવા કહ્યું હતું. મુખ્ય પ્રધાન પિનરાયી વિજયને ઠરાવ રજૂ કરતી વખતે કહ્યું હતું કે રાજ્યનું નામ મલયાલમમાં `કેરલમ` છે, અને સ્વતંત્રતા સંગ્રામના સમયથી, મલયાલમ ભાષી સમુદાય માટે એક સંયુક્ત કેરળની માગ કરવામાં આવી રહી છે. તેમણે એમ પણ કહ્યું કે બંધારણની આઠમી અનુસૂચિમાં સમાવિષ્ટ બધી ભાષાઓમાં રાજ્યનું નામ બદલવું જરૂરી છે.
ગૃહ મંત્રાલય દ્વારા સમીક્ષા અને કેન્દ્રીય ગૃહ પ્રધાન અમિત શાહ દ્વારા મંજૂરી પછી, આ પ્રસ્તાવ કાયદા અને ન્યાય વિભાગને મોકલવામાં આવ્યો હતો. કાયદા અને ન્યાય વિભાગે આ પ્રસ્તાવને ટેકો આપ્યો હતો અને કહ્યું હતું કે નામ બદલવામાં કોઈ કાનૂની અવરોધો નથી. ચૂંટણી પહેલા રાજ્યનું નામ બદલવાની આ જાહેરાત રાજકીય ચર્ચાનો વિષય બની ગઈ છે. વિશ્લેષકો કહે છે કે તેનાથી ભાજપ અને તેના સાથી પક્ષોને ફાયદો થઈ શકે છે. રાજ્યમાં વિધાનસભાની ચૂંટણીઓ એપ્રિલ-મે મહિનામાં યોજાવાની છે, જેના કારણે આ નિર્ણય સમયસર છે.
આ પગલાને રાજ્યના ઇતિહાસ અને ઓળખ સાથે સંબંધિત એક મહત્ત્વપૂર્ણ ફેરફાર માનવામાં આવે છે.
