ભારતે પ્રલય મિસાઇલનું સફળ પરીક્ષણ કર્યું: દુશ્મનોની ઍર ડિફેન્સ સિસ્ટમને ભેદવામાં સક્ષમ

સવારે ૧૧.૧૦ વાગ્યે કરાયેલું આ પરીક્ષણ યુઝર ઇવૅલ્યુએશન ટ્રાયલનો એક ભાગ હતું.

ડિફેન્સ રિસર્ચ ઍન્ડ ડેવલપમેન્ટ ઑર્ગેનાઇઝેશન (DRDO)એ ઓડિશાના દરિયાકાંઠે ‘પ્રલય’ મિસાઇલનું સફળ પરીક્ષણ થયું હતું

ભારતની સૈન્ય-તાકાતમાં ગુરુવારે વધુ એક મોટો ઉમેરો થયો છે. ડિફેન્સ રિસર્ચ ઍન્ડ ડેવલપમેન્ટ ઑર્ગેનાઇઝેશન (DRDO)એ ઓડિશાના દરિયાકાંઠે ‘પ્રલય’ મિસાઇલનું સફળ પરીક્ષણ થયું હતું. સવારે ૧૧.૧૦ વાગ્યે કરાયેલું આ પરીક્ષણ યુઝર ઇવૅલ્યુએશન ટ્રાયલનો એક ભાગ હતું.

મિસાઇલે એના તમામ લક્ષ્યાંકો સિદ્ધ કર્યા હતા. ‘પ્રલય’ એ સૉલિડ-પ્રોપેલન્ટ ધરાવતી અને જમીનથી જમીન પર પ્રહાર કરતી ક્વૉઝી-બૅલિસ્ટિક મિસાઇલ છે. પેલોડના વજનના આધારે એની મારકક્ષમતા ૧૫૦થી ૫૦૦ કિલોમીટર સુધીની છે. એ ૧૦૦૦ કિલો પેલોડ સાથે ૩૫૦ કિલોમીટર અને ૫૦૦ કિલો પેલોડ સાથે ૫૦૦ કિલોમીટર સુધી પ્રહાર કરવા સક્ષમ છે. આ મિસાઇલ અત્યાધુનિક ગાઇડન્સ સિસ્ટમથી સજ્જ છે. એ હવામાં પોતાનો માર્ગ બદલવાની પણ ક્ષમતા ધરાવે છે, જેનાથી દુશ્મનની ઍર ડિફેન્સ સિસ્ટમ માટે એને તોડી પાડવી લગભગ અશક્ય છે. એને મોબાઇલ લૉન્ચર પરથી પણ છોડી શકાય છે.