26 September, 2026 04:39 PM IST | New Delhi | Bespoke Stories Studio
ગુજરાતના મુખ્યમંત્રી ભૂપેન્દ્ર પટેલે પૂજ્ય ગુરુદેવશ્રી રાકેશજીને ૬૦મા જન્મદિવસની શુભેચ્છાઓ પાઠવી; રાજનાથ સિંહ અને કનુભાઈ દેસાઈએ પણ વંદન કર્યા
શ્રીમદ્ રાજચંદ્ર મિશન ધરમપુર (SRMD) ના પ્રણેતા પૂજ્ય ગુરુદેવશ્રી રાકેશજીના ૬૦મા જન્મદિવસ નિમિત્તે ગુજરાતના મુખ્યમંત્રી ભૂપેન્દ્ર પટેલ સહિત દેશના અગ્રણી નેતાઓએ શુભેચ્છાઓ પાઠવી હતી. કેન્દ્રીય સંરક્ષણ મંત્રી રાજનાથ સિંહ અને ગુજરાતના નાણામંત્રી કનુભાઈ દેસાઈએ પણ સોશિયલ મીડિયા પર સંદેશ પાઠવીને ગુરુદેવશ્રી પ્રત્યે આદર વ્યક્ત કર્યો હતો.
મુખ્યમંત્રી ભૂપેન્દ્ર પટેલે @SRMDharampur ને ટેગ કરીને X પર લખ્યું, “શ્રીમદ્ રાજચંદ્ર મિશન, ધરમપુરના પ્રણેતા પૂજ્ય ગુરુદેવ શ્રી રાકેશજીને જન્મદિવસની ભાવભરી શુભેચ્છાઓ.” તેમણે ઉમેર્યું કે આત્મજાગૃતિ, જીવદયા અને સર્વ જીવોના કલ્યાણ માટે ગુરુદેવશ્રીનું આત્મીય માર્ગદર્શન સમાજને અવિરત મળતું રહે છે. સાથે જ, પ્રભુ તેમને ઉત્તમ સ્વાસ્થ્ય અને દીર્ઘાયુ અર્પે તેવી અંતઃકરણપૂર્વક પ્રાર્થના પણ કરી હતી. મુખ્યમંત્રીએ એક કાર્યક્રમ દરમિયાન ગુરુદેવશ્રીનું અભિવાદન કરતી પોતાની તસવીર પણ શેર કરી હતી.
કેન્દ્રીય સંરક્ષણ મંત્રી રાજનાથ સિંહે X પર લખ્યું કે પૂજ્ય ગુરુદેવશ્રી રાકેશજીના ૬૦મા જન્મદિવસે જ્ઞાન, ભક્તિ અને નિઃસ્વાર્થ સેવાને સમર્પિત જીવનનો ઉત્સવ મનાવવામાં આવે છે. તેમણે જણાવ્યું કે આધ્યાત્મિક જાગૃતિ અને જ્ઞાનના ક્ષેત્રે ગુરુદેવશ્રીનું ઊંડું યોગદાન વિશ્વભરમાં અસંખ્ય લોકોના જીવનને પ્રકાશિત કરી રહ્યું છે, અને તેમને હાર્દિક શુભેચ્છાઓ પાઠવી. ગુરુદેવશ્રીનાં જ્ઞાન, કરુણા અને ભક્તિ લોકોને પ્રેરણા આપતાં રહે અને માનવતાને વધુ શાંતિ, સંવાદિતા તથા આંતરિક જાગૃતિ તરફ દોરતાં રહે, એવી આશા પણ તેમણે વ્યક્ત કરી હતી.
ગુજરાતના નાણામંત્રી અને પારડીના ધારાસભ્ય કનુભાઈ દેસાઈએ ઇન્સ્ટાગ્રામ પર ગુરુદેવશ્રીની ૬૦ વર્ષની સાધનાને સાદર નમન કર્યા. તેમણે લખ્યું કે ગુરુદેવશ્રીએ શ્રીમદ્ રાજચંદ્રજી પ્રત્યેની પરમ ભક્તિને પોતાના જીવનનું ધ્યેય બનાવીને તેમના અમર સંદેશને વિશ્વવ્યાપી બનાવ્યો છે. તેમણે કહ્યું, “આપે ગુરુના વિચારોને માત્ર પ્રસાર્યા નથી, પરંતુ તેમને સેવા, સાધના અને માનવકલ્યાણના જીવંત પ્રવાહમાં પરિવર્તિત કર્યા છે.” આ પાવન ષષ્ટિપૂર્તિ અવસરે તેમણે SRMDને હાર્દિક શુભેચ્છાઓ પણ પાઠવી હતી.
પૂજ્ય ગુરુદેવશ્રી રાકેશજીના જન્મદિવસની ઉજવણી મુંબઈમાં ‘અહો ગુરુદેવ’ કાર્યક્રમ સાથે કરવામાં આવી હતી. આ બે દિવસીય કાર્યક્રમ ૨૫ અને ૨૬ સપ્ટેમ્બરે બીકેસી સ્થિત જિયો વર્લ્ડ કન્વેન્શન સેન્ટર ખાતે યોજાયો હતો.
શ્રીમદ્ રાજચંદ્ર મિશન ધરમપુરની સ્થાપના પૂજ્ય ગુરુદેવશ્રી રાકેશજીએ કરી છે. શ્રીમદ્ રાજચંદ્રજીના ઉપદેશો પર આધારિત આ વૈશ્વિક આધ્યાત્મિક સંસ્થા આધ્યાત્મિક સાધનાની સાથે વ્યાપક માનવતાવાદી સેવાકાર્યો પણ કરે છે.
