10 July, 2026 07:24 PM IST | Mumbai | Gujarati Mid-day Online Correspondent
અકાસા ઍર (ફાઈલ તસવીર)
જો તમે નોએડા અને નવી મુંબઈ વચ્ચે સીધી ફ્લાઇટથી મુસાફરી કરવાની યોજના બનાવી રહ્યા હતા, તો આ સમાચાર તમારા માટે મહત્વના છે. અકાસા ઍરે આ રૂટ પર શરૂ કરેલી પોતાની ફ્લાઇટ સેવા શરૂ થયાના માત્ર બે અઠવાડિયામાં જ બંધ કરવાનો નિર્ણય લીધો છે. આ રૂટ ખાસ હતો કારણ કે નોએડા ઇન્ટરનેશનલ ઍરપોર્ટ અને નવી મુંબઈ ઇન્ટરનેશનલ ઍરપોર્ટ વચ્ચે સીધી ફ્લાઇટ શરૂ કરનારી અકાસા ઍર એકમાત્ર ઍરલાઇન હતી. અકાસા ઍરે 16 જૂને નવી મુંબઈ અને નોએડા વચ્ચે દરરોજ સીધી ફ્લાઇટ સેવા શરૂ કરી હતી. આ સેવા બંને નવા આંતરરાષ્ટ્રીય ઍરપોર્ટને જોડવાના હેતુથી શરૂ કરવામાં આવી હતી. કંપનીનું કહેવું છે કે, નેટવર્કને વધુ સારું બનાવવા અને વિમાનોનો યોગ્ય ઉપયોગ કરવા માટે આ નિર્ણય લેવામાં આવ્યો છે. જોકે, મુસાફરોની ઓછી સંખ્યા અને અન્ય વ્યવહારિક કારણોને કારણે કંપનીએ હાલ માટે આ સેવા બંધ કરવાનો નિર્ણય લીધો છે. અપેક્ષા મુજબ મુસાફરોની સંખ્યા ન વધતા જુલાઈથી આ રૂટ પરની ફ્લાઇટ્સ બંધ કરી દેવામાં આવી છે.
કંપનીના જણાવ્યા અનુસાર, મુસાફરોની માગ, હવામાનની સ્થિતિ અને ઉપલબ્ધ વિમાનોને ધ્યાનમાં રાખીને ફ્લાઇટ રૂટમાં ફેરફાર કરવો સામાન્ય પ્રક્રિયાનો એક ભાગ છે. આ અંતર્ગત, કેટલીક ફ્લાઇટ સેવાઓમાં વધારો કરવામાં આવે છે, જ્યારે કેટલીક સેવાઓને થોડા સમય માટે બંધ કરવામાં આવે છે. હાલમાં અકાસા ઍરે મુંબઈ અને નોએડા વચ્ચે પોતાની ફ્લાઇટ્સની સંખ્યા વધારી છે. કંપનીનું કહેવું છે કે, નોએડા-નવી મુંબઈ રૂટ પરની ફ્લાઇટ સેવા ઓક્ટોબર 2026થી ફરી શરૂ કરવાની યોજના છે.
નોએડા ઇન્ટરનેશનલ ઍરપોર્ટ અને નવી મુંબઈ ઇન્ટરનેશનલ ઍરપોર્ટ બંને નવા ઍરપોર્ટ છે. હાલમાં આ ઍરપોર્ટ સુધી પહોંચવા માટેની રસ્તા અને જાહેર પરિવહનની સુવિધાઓ સંપૂર્ણ રીતે તૈયાર થઈ નથી. ઘણા મુસાફરોને ઍરપોર્ટ સુધી પહોંચવા માટે લાંબી મુસાફરી કરવી પડે છે અને ટેક્સીનો ખર્ચ પણ વધારે આવે છે. આ કારણે હાલ આ બંને ઍરપોર્ટ પરથી મુસાફરોની સંખ્યા અપેક્ષા મુજબ વધી રહી નથી. ઍરલાઇન્સનું કહેવું છે કે, મુસાફરો ઓછા મળતા હોય અને સંચાલન ખર્ચ વધારે હોય તો નવા રૂટને લાંબા સમય સુધી ચાલુ રાખવું મુશ્કેલ બને છે. વિમાન ક્ષેત્રના નિષ્ણાતોનું માનવું છે કે, જ્યાં સુધી આ ઍરપોર્ટ સુધી પહોંચવા માટે રસ્તા, મેટ્રો અને અન્ય જાહેર પરિવહનની સુવિધાઓ વધુ સારી નહીં બને, ત્યાં સુધી આવા રૂટ પર મુસાફરો મેળવવામાં ઍરલાઇન્સને મુશ્કેલી પડી શકે છે.
આ નિર્ણયની સૌથી વધુ અસર નોએડા અને નવી મુંબઈ વચ્ચે સીધી ફ્લાઇટથી મુસાફરી કરવા માગતા મુસાફરો પર પડશે. હવે તેમને મુંબઈના અન્ય ઍરપોર્ટ અથવા કોઈ બીજા શહેર મારફતે કનેક્ટિંગ ફ્લાઇટ લેવી પડી શકે છે. આના કારણે મુસાફરીનો સમય અને ખર્ચ બંને વધી શકે છે. જોકે, કંપનીએ સ્પષ્ટ કર્યું છે કે આ નિર્ણય કાયમી નથી આવનારા સમયમાં જો પ્રવાસીઓની માગમાં વધારો થશે અને બંને હવાઈ મથકો વચ્ચેનું જોડાણ વધુ સારુ બનશે, તો આ રૂટ પર ફ્લાઇટ સેવા ફરી શરૂ કરવામાં આવશે. હાલમાં અકાસા ઍરનું ધ્યાન એવા રૂટ્સ પર છે, જ્યાં મુસાફરોની સંખ્યા વધારે છે અને ફ્લાઇટ સેવા વધુ સારી રીતે ચલાવી શકાય છે.
