પાઇલટ્સને લઈને ઍર ઇન્ડિયાનો મોટો નિર્ણય: જાણો શું પગલાં લેવામાં આવ્યા?

Air India Increase Retirement Age: ભારતીય ઍરલાઇન ઍર ઇન્ડિયાએ પાઇલટ્સની નિવૃત્તિ વય 65 વર્ષ અને નોન-ફ્લાઇંગ સ્ટાફની નિવૃત્તિ વય 60 વર્ષ કરવાનો નિર્ણય લીધો છે. હાલમાં, ઍરલાઇનમાં પાઇલટ્સ અને નોન-ફ્લાઇંગ સ્ટાફ બંનેની નિવૃત્તિ વય 58 વર્ષ છે.

પ્રતીકાત્મક તસવીર (સૌજન્ય: મિડ-ડે)

ભારતીય ઍરલાઇન ઍર ઇન્ડિયાએ પાઇલટ્સની નિવૃત્તિ વય 65 વર્ષ અને નોન-ફ્લાઇંગ સ્ટાફની નિવૃત્તિ વય 60 વર્ષ કરવાનો નિર્ણય લીધો છે. હાલમાં, ઍરલાઇનમાં પાઇલટ્સ અને નોન-ફ્લાઇંગ સ્ટાફ બંનેની નિવૃત્તિ વય 58 વર્ષ છે. સૂત્રોએ જણાવ્યું હતું કે નિવૃત્તિ વય વધારવાની જાહેરાત તાજેતરમાં કંપનીની બેઠકમાં સીઈઓ અને એમડી કેમ્પબેલ વિલ્સન દ્વારા કરવામાં આવી હતી.

ઍર ઇન્ડિયામાં કેટલા કર્મચારીઓ છે?
હાલમાં, આ સંદર્ભમાં ઍર ઇન્ડિયા તરફથી કોઈ સત્તાવાર ટિપ્પણી કરવામાં આવી નથી. ટાટા ગ્રુપની માલિકીની ઍર ઇન્ડિયામાં લગભગ 24,000 કર્મચારીઓ છે, જેમાં 3,600 પાઇલટ અને 9,500 કેબિન ક્રૂ સભ્યોનો સમાવેશ થાય છે. ઍર ઇન્ડિયામાં કેબિન ક્રૂની નિવૃત્તિ વય, જે હાલમાં 58 વર્ષ છે, તેમાં વધારો કરવામાં આવ્યો છે કે નહીં તે તાત્કાલિક જાણી શકાયું નથી.

વિસ્તારા સાથે સમાનતા, કેબિન ક્રૂ અંગે નિર્ણય સ્પષ્ટ નથી
નવેમ્બર 2024 માં ટાટા ગ્રુપની વિસ્તારાનું ઍર ઇન્ડિયા સાથે વિલીનીકરણ થયું. ત્યારથી, ઍર ઇન્ડિયાના કેટલાક પાઇલટ્સ નિવૃત્તિ વયમાં અસમાનતા પર ગુસ્સે હતા. નવા નિર્ણયથી આ અસમાનતાનો અંત આવશે. હાલમાં, કેબિન ક્રૂની નિવૃત્તિ વય 58 વર્ષ છે અને તેને વધારવા અંગે કોઈ સ્પષ્ટ માહિતી આપવામાં આવી નથી.

તાજેતરમાં ઘણા લોકોએ કંપનીમાં નોકરી છોડી દીધી છે
તાજેતરના દિવસોમાં, ઍર ઇન્ડિયાના કેટલાક પાઇલટ્સ અને કેબિન ક્રૂએ રાજીનામું આપ્યું હતું. આ સંદર્ભમાં, કંપનીના સીઈઓ અને એમડી કેમ્પબેલ વિલ્સને ટાઉન હૉલ મીટિંગમાં જણાવ્યું હતું કે આ પગલું સ્ટાફ સ્થિરતા અને અનુભવ જાળવવામાં મદદ કરશે.

તાજેતરમાં, કેન્દ્ર સરકારના જણાવ્યા અનુસાર, અમદાવાદમાં વિમાન દુર્ઘટનાના ચાર દિવસ પછી, 16 જૂને 112 પાઇલટ્સે મૅડિકલ લીવ લીધી હતી. તમને જણાવી દઈએ કે 12 જૂને અમદાવાદ ઍરપોર્ટ પરથી ઉડાન ભર્યા પછી તરત જ ઍર ઇન્ડિયાનું બોઇંગ 787-8 વિમાન ક્રેશ થયું હતું. આ અકસ્માતમાં 260 લોકોના મોત થયા હતા. વિમાનમાં સવાર 242 લોકોમાંથી ફક્ત એક જ વ્યક્તિ બચી ગયો હતો. વિમાન બિલ્ડિંગ સાથે અથડાતાં ત્યાં હાજર 19 લોકોનું પણ મૃત્યુ થયું હતું. નાગરિક ઉડ્ડયન રાજ્યમંત્રી મુરલીધર મોહોલે ગુરુવારે લોકસભામાં એક પ્રશ્નના લેખિત જવાબમાં જણાવ્યું હતું કે મેડિકલ રજા લેનારા ઍર ઇન્ડિયાના પાઇલટ્સની સંખ્યામાં થોડો વધારો થયો છે. અમદાવાદ વિમાન દુર્ઘટના પછી, 16 જૂને કુલ 112 પાઇલટ્સ બીમાર હોવાનું જાણવા મળ્યું હતું, જેમાં 51 કમાન્ડર (P1) અને 61 ફર્સ્ટ ઑફિસર (P2)નો સમાવેશ થાય છે. હકીકતમાં, એક સભ્ય જાણવા માગતો હતો કે શું ઍર ઇન્ડિયા વિમાન દુર્ઘટના પછી ક્રૂ મેમ્બર્સ મોટા પાયે બીમાર હોવાની જાણ કરી રહ્યા છે. તેમના જવાબમાં, મંત્રીએ કહ્યું કે ઍર ઇન્ડિયા ફ્લાઇટ AI-171 દુર્ઘટના પછી ઍરલાઇનના પાઇલટ્સમાં માંદગીની રજામાં થોડો વધારો થયો છે.