હવે BMCને વપરાયેલાં સૅનિટરી પૅડ્સ, ડાયપર્સ કે એક્સપાયર થઈ ગયેલી દવાઓ અલગ પાડીને આપો

હાઉસિંગ સોસાયટીઓ, બ્યુટી-પાર્લરો, મહિલા હૉસ્ટેલો, કૉલેજો રજિસ્ટ્રેશન કરાવી શકશે

પ્રતીકાત્મક તસવીર

બૃહન્મુંબઈ મ્યુનિસિપલ કૉર્પોરેશન (BMC)એ સૅનિટરી પૅડ, ડાયપર, એક્સપાયર થયેલી દવાઓ, બ્યુટી-પાર્લરમાંથી નીકળતા કચરાને અલગ કરવા માટે નવી યોજના અમલમાં મૂકી છે. ‘ડોમેસ્ટિક સૅનિટરી ઍન્ડ સ્પેશ્યલ કૅર વેસ્ટ કલેક્શન’ નામે BMCના સૉલિડ વેસ્ટ-મૅનેજમેન્ટ ડિપાર્ટમેન્ટ દ્વારા ૧ મેથી આ નવી યોજના શરૂ કરવામાં આવશે.

હાઉસિંગ સોસાયટી, બ્યુટી-પાર્લર, મહિલા હૉસ્ટેલ અને શૈક્ષણિક સંસ્થાઓ રજિસ્ટ્રેશન કરાવીને આ સર્વિસનો લાભ લઈ શકે છે. પહેલી મેથી BMC સૅનિટરી કચરાનું કલેક્શન શરૂ કરશે. BMCએ આ વિશે આપેલા નિવેદનમાં જણાવ્યું હતું કે મુંબઈમાં રોજનો ૭૦૦૦ ટનથી ૮૦૦૦ ટન કચરો જમા થાય છે જેમાંથી ૭૦થી ૮૦ ટન કચરો સૅનિટરી નૅ​​​પ્કિન, ડાયપર્સ, ટૅમ્પૉન્સ, કૉન્ડોમ્સ, બૅન્ડેજ, શરીરમાંથી નીકળતા અન્ય પ્રવાહીવાળા કૉટન, એક્સપાયર થયેલી દવાઓ, ઇન્જેક્શનની નીડલ, રેઝરની બ્લેડ, વૅક્સના પટ્ટા કે PPE કિટ જેવી પર્સનલ હાઇજીનની વસ્તુઓનો હોય છે; આ બધી વસ્તુઓને જુદી કરવામાં ક્યારેક કામદારોને કોઈ ચેપ લાગી શકે છે અને કચરાની પ્રોસેસિંગમાં પણ અડચણ આવે છે.