વસઈ રોડ-વિરાર અને બોરીવલી-દહિસર વચ્ચે આજે રાતે જમ્બો બ્લૉક

રાતે બ્લૉક દરમ્યાન વસઈ રોડ અને વિરાર સ્ટેશન વચ્ચે સ્લો લાઇનની ટ્રેનો ફાસ્ટ લાઇન પર ચલાવવામાં આવશે

પ્રતીકાત્મક ફાઇલ તસવીર

વેસ્ટર્ન રેલવેમાં આજે મધરાતે ૧૨.૧૫ વાગ્યાથી વહેલી સવારે ૪.૧૫ વાગ્યા સુધી વસઈ રોડ અને વિરાર સ્ટેશન વચ્ચે અપ અને ડાઉન સ્લો લાઇન પર ૪ કલાકનો જમ્બો બ્લૉક લેવામાં આવશે. ઉપરાંત  નવા ફુટ ઓવર બ્રિજ (FOB)ના ગર્ડર માટે બોરીવલી અને દહિસર સ્ટેશન વચ્ચેની બધી લાઇનો પર આજે રાતે ૨.૧૦ વાગ્યાથી વહેલી સવારે ૪.૧૦ વાગ્યા સુધી બે કલાકનો એક મોટો બ્લૉક પણ હાથ ધરવામાં આવશે. જોકે રવિવારે બાવીસ ફેબ્રુઆરીએ દિવસ દરમ્યાન વેસ્ટર્ન રેલવેમાં કોઈ બ્લૉક રહેશે નહીં.

આજે રાતે બ્લૉક દરમ્યાન વસઈ રોડ અને વિરાર સ્ટેશન વચ્ચે સ્લો લાઇનની ટ્રેનો ફાસ્ટ લાઇન પર ચલાવવામાં આવશે. બોરીવલી અને દહિસર વચ્ચે FOB લૉન્ચિંગ બ્લૉકને કારણે કેટલીક લોકલ અને મેલ/એક્સપ્રેસ ટ્રેનો પણ પ્રભાવિત થશે.

ટ્રેન-નંબર ૧૯૦૩૮ બરૌની–બાંદરા ટર્મિનસ અવધ એક્સપ્રેસ વિરાર અને ભાઈંદર સ્ટેશન વચ્ચે એક કલાક માટે ઊભી રહેશે.

ટ્રેન-નંબર ૨૨૯૪૬ ઓખા-મુંબઈ સેન્ટ્રલ સૌરાષ્ટ્ર મેલ વિરાર અને ભાઈંદર સ્ટેશન વચ્ચે ૪૫ મિનિટ માટે ઊભી રહેશે..

ટ્રેન-નંબર ૨૨૯૦૪ ભુજ–બાંદરા ટર્મિનસ AC સુપરફાસ્ટ એક્સપ્રેસ સુરત અને વિરાર સ્ટેશન વચ્ચે ૨૦ મિનિટ માટે ઊભી રહેશે..

વિરારથી સવારે ૩.૨૫ અને ૩.૪૦ વાગ્યાની ચર્ચગેટ લોકલ ૧૫ મિનિટ મોડી ઊપડશે.