14 July, 2026 07:22 AM IST | Mumbai | Gujarati Mid-day Correspondent
મહિલાને ચોરાયેલું મંગળસૂત્ર પાછું આપતી રાબોડી પોલીસ.
સ્નૅબિટ ઍપ્લિકેશન દ્વારા બુક કરેલી વર્કરે થાણેના રુણવાલનગરમાં રહેતી એક મહિલાના ઘરેથી મંગળસૂત્ર ચોરી લીધું હોવાનો બનાવ બન્યો હતો. સાફસફાઈ કરતી વખતે આરોપી વર્કરે ચૂપચાપ અનુજા સાવંત નામનાં ૫૮ વર્ષનાં મહિલાનું બેડરૂમમાં મૂકેલું અઢી તોલાનું મંગળસૂત્ર સેરવી લીધું હતું. જોકે પોલીસની કાર્યવાહી બાદ પકડાયેલી મહિલા પ્રત્યે દયા બતાવીને ફરિયાદી મહિલાએ તેની વિરુદ્ધ કોઈ પોલીસ-કાર્યવાહી ન કરવાનું નક્કી કરીને તેને માફ કરી હતી.
પોલીસે આપેલી માહિતી મુજબ સ્નૅબિટ ઍપ પરથી ડીપ ક્લીન માટે આવેલી વર્કર સાફસફાઈ કરીને જતી રહી ત્યાર બાદ મહિલાને તેનું મંગળસૂત્ર ગાયબ હોવાનું ધ્યાનમાં આવતાં તરત જ રાબોડી પોલીસ-સ્ટેશનમાં ફરિયાદ નોંધાવી હતી. પોલીસે પણ ટેક્નિકલ સર્વેલન્સ સહિત અન્ય પુરાવાના આધારે ફક્ત એક જ કલાકમાં વર્કરને શોધી લીધી હતી અને મહિલાને તેનું મંગળસૂત્ર પાછું અપાવ્યું હતું.
