વ્યુઝ અને લાઇક્સ વધારવાની લાલસા નાલાસોપારાના ઇન્ફ્લુએન્સરને ભારે પડી

દલિત સમુદાય સામે અપમાનજનક પોસ્ટ કરવા બદલ પોલીસે બરાબરનો પાઠ ભણાવ્યો

ઉશ્કેરણીજનક પોસ્ટ મૂકનાર ઇન્ફ્લુએન્સર સાથે આચોલે પોલીસ-ટીમ.

નાલાસોપારાના આચોલે પોલીસે ૨૪ વર્ષના સોશ્યલ મીડિયા ઇન્ફ્લુએન્સર સામે દલિત સમુદાયને લક્ષ્ય બનાવતી અપમાનજનક સામગ્રી પોસ્ટ કરવા બદલ કડક કાર્યવાહી કરી હતી.

નાલાસોપારા-ઈસ્ટમાં રહેતા આ યુવકે દલિત તથા મુસ્લિમ સમુદાય બાબતે, ધર્માંતરણ વિશે અને આ સરકાર હિન્દુઓની હોવા જેવી ઉશ્કેરણીજનક વાતો કરતી પોસ્ટ મૂકી હતી.

આ વિડિયો ઝડપથી વાઇરલ થયો હતો જેને કારણે દલિતોમાં આક્રોશ ફેલાયો હતો. ઉશ્કેરણી બાદ દલિત સમુદાયના સભ્યોએ પોલીસ-ફરિયાદ નોંધાવી હતી. મામલાની સંવેદનશીલતાને તાત્કાલિક ધ્યાનમાં લેતાં આચોલે પોલીસે શંકાસ્પદ વ્યક્તિને શોધી કાઢી હતી. તેને કસ્ટડીમાં લઈને કડક કાર્યવાહી કરી હતી અને તેનો હાથ જોડી માફી માગતો વિડિયો બનાવીને એને શૅર કરવાની ફરજ પાડી હતી.