માઘી ગણેશોત્સવમાં PoPની મૂર્તિ બાબતે BMCએ કરી હાઈ કોર્ટના આદેશની ઐૈસીતૈસી

ત્રણ સુધરાઈએ નોટિસ જાહેર કરી, પણ એમાં મુંબઈ મહાનગરપાલિકાનો સમાવેશ નથી

બૉમ્બે હાઈ કોર્ટની ફાઈલ તસવીર

માઘી ગણેશોત્સવ શરૂ થવાના એક દિવસ પહેલાં બૉમ્બે હાઈ કોર્ટે મુંબઈ સહિત છ મહાનગરપાલિકાઓને પ્લાસ્ટર ઑફ પૅરિસ (PoP)ની મૂર્તિ બનાવનારા, સ્થાપના અને વિસર્જન કરનારા સામે કડક હાથે કાર્યવાહી કરવાનો આદેશ આપ્યો હતો. જોકે થાણે, મીરા ભાઈંદર અને કલ્યાણ-ડોમ્બિવલી મહાનગરપાલિકા સિવાય કોઈએ કોર્ટના આદેશને ગંભીરતાથી ન લીધો હોવાનું જણાઈ આવ્યું છે. આ ત્રણેય સુધરાઈએ PoPની મૂર્તિ બાબતે નોટિસ જાહેર કરી છે પણ બૃહન્મુંબઈ મ્યુનિસિપલ કૉર્પોરેશન (BMC), નવી મુંબઈ અને વસઈ-વિરાર મહાનગરપાલિકાએ હાઈ કોર્ટના આદેશની અવગણના કરી હોવાનું જાણવા મળ્યું હતું.

હાઈ કોર્ટના આદેશને પગલે થાણે, મીરા ભાઈંદર મહાનગરપાલિકાએ આ સંબંધે ૩૧ જાન્યુઆરી તો કલ્યાણ-ડોમ્બિવલી મહાનગરપાલિકાએ ૧ ફેબ્રુઆરીએ નોટિસ જાહેર કરી હતી; જેમાં PoPની મૂર્તિની બનાવનારા, સ્થાપના કરનારા અને વિસર્જન કરનારાઓ સામે કાર્યવાહી કરવામાં આવશે એવું લખ્યું હતું. BMC, વસઈ-વિરાર અને નવી મુંબઈ મહાનગરપાલિકા દ્વારા આવી કોઈ નોટિસ કે ચેતવણી ગઈ કાલ સુધી જાહેર નહોતી કરવામાં આવી.