વર્ષના અંત સુધીમાં ૪ મેટ્રો લાઇન આંશિક રીતે શરૂ થવાની શક્યતા

અત્યારે ૪ લાઇન કાર્યરત છે જે કુલ મળી ૫૮.૯ કિલોમીટરનું અંતર કવર કરે છે, બીજી આઠ મેટ્રો ચાલુ​ થતાં ૧૬૫.૭ કિલોમીટર સુધીની કનેક્ટિવિટી વિકસી શકશે.

પ્રતીકાત્મક તસવીર

મુંબઈમાં લોકલ ટ્રેન અને બૃહન્મુંબઈ ઇલેક્ટ્રિક સપ્લાય ઍન્ડ ટ્રાન્સપોર્ટ (BEST) સૌથી વધુ વપરાતાં પબ્લિક ટ્રાન્સપોર્ટનાં માધ્યમ છે એમાં હવે ધીમે-ધીમે મેટ્રો પણ એનો ફાળો નોંધાવી રહી છે. મુંબઈ મેટ્રોપૉલિટન રીજન (MMR)માં ૧૪ મેટ્રો લાઇનનું જાળું વિકસાવી રહેલી મુંબઈ મેટ્રોપૉલિટન રીજન ડેવલપમેન્ટ ઑથોરિટી (MMRDA) આ વર્ષના અંત સુધીમાં નવી ૪ મેટ્રો લાઇન ઍટ લીસ્ટ આંશિક રીતે શરૂ કરે એવી શક્યતા છે. અત્યારે ૪ લાઇન કાર્યરત છે જે કુલ મળી ૫૮.૯ કિલોમીટરનું અંતર કવર કરે છે, બીજી આઠ મેટ્રો ચાલુ​ થતાં ૧૬૫.૭ કિલોમીટર સુધીની કનેક્ટિવિટી વિકસી શકશે.

મુખ્ય કેટલીક લાઇનનું કામ કેટલે સુધી પહોંચ્યું?

મેટ્રો-9 (રેડ લાઇન) : દહિસરથી મીરા રોડ

ક્યારે શરૂ થશે? :  ડિસેમ્બર ૨૦૨૫માં દહિસરથી કાશીગાવ સુધી (૪.૫ કિલોમીટર)

અત્યારની શું પરિસ્થિતિ? : ૯૮ ટકા કામ પૂરું થઈ ગયું છે. 

મેટ્રો- ‍2B (યલો લાઇન): ડી. એન. નગરથી મંડાલે વાયા BKC અને કુર્લા.

ક્યારે શરૂ થશે? : ડિસેમ્બર ૨૦૨૫ (મંડાલેથી ડાયમન્ડ ગાર્ડન ચેમ્બુર સુધી, ૫.૪ કિલોમીટર)

અત્યારે શું પરિસ્થિતિ? : ૭૮ ટકા કામ પૂરું થઈ ગયું છે.

મેટ્રો - 3 (ઍક્વા લાઇન): આરેથી કફ પરેડ (અન્ડરગ્રાઉન્ડ)

ક્યારે શરૂ થશે? : ઑગસ્ટ ૨૦૨૫ (કફ પરેડથી આચાર્ય અત્રે ચોક, ૧૧.૫૭ કિલોમીટર)

અત્યારે શું પરિસ્થિતિ? : ૯૯.૮૬ ટકા કામ પતી ગયું છે.

મેટ્રો – 4 અને 4A (ગ્રીન લાઇન):  વડાલાથી કાસારવડવલી અને ગાયમુખ

ક્યારે શરૂ થશે? : ૨૦૨૬ની શરૂઆતમાં (ગાયમુખથી કૅડબરી જંક્શન)

અત્યારે શું પરિસ્થિતિ? : ૮૪ ટકા કામ પતી ગયું છે.

પબ્લિક ટ્રાન્સપોર્ટમાં બધે જ વાપરી શકાય એવી એક જ ઍપ આવી રહી છે

મુંબઈ મેટ્રોપૉલિટન રીજન (MMR)ની ૧૧ પબ્લિક ટ્રાન્સપોર્ટ સિસ્ટમમાં ચાલી શકે એવી મુંબઈ વન ઍપ વિકસાવવામાં આવી રહી છે જેમાં સેન્ટ્રલ રેલવે, હાર્બર રેલવે, ટ્રાન્સહાર્બર, વેસ્ટર્ન રેલવે, બધી જ મેટ્રો લાઇન, મોનો રેલ, ‍BEST, થાણે મ્યુનિસિપલ ટ્રાન્સપોર્ટ (TMT), કલ્યાણ-ડોમ્બિવલી મ્યુનિસિપલ ટ્રાન્સપોર્ટ (KDMT), મીરા ભાઈંદર મ્યુનિસિપલ ટ્રાન્સપોર્ટ (MBMT) અને નવી મુંબઈ મ્યુનિસિપલ ટ્રાન્સપોર્ટ (NMMT)નો સમાવેશ થાય છે.

આ ઍપમાં પ્રવાસીઓ મૅપ જોઈને તેમની મુસાફરી પ્લાન કરી શકશે. મલ્ટિમૉડલ ટ્રાવેલ કરવા છતાં એક જ QR કોડ વાપરી શકાશે. સર્વિસ અપડેટ મળતી રહેશે. સુરક્ષા માટે SOS (સેવ અવર સોલ)નું ફીચર પણ હશે. સરળતાથી ઑનલાઇન ટિકિટ લઈ શકાશે. પેપરલેસ, કૅશલેસ ટ્રાવેલ કરી શકાશે.