23 September, 2022 11:02 AM IST | Mumbai | Gujarati Mid-day Correspondent
લોકલમાં લગેજની રેક તુટી
વેસ્ટર્ન રેલવેમાં ગઈ કાલે ચર્ચગેટથી ૭.૪૯ વાગ્યે વિરાર જવા નીકળેલી એસી લોકલમાં એક લગેજ રેક તૂટી પડી હતી. આ બાબતની જાણ તરત જ રેલવેને કરવામાં આવતાં રેલવેના મેઇન્ટેનન્સ સ્ટાફે એ કોચમાં જઈને રેક ફરી ફિટ કરી દીધી હતી. આ ઘટના બદલ રેલવેએ કહ્યું હતું કે ‘એ લગેજ રેકનો સ્ક્રૂ ઢીલો થઈ ગયો હોવાથી આ દુર્ઘટના બની હતી. જોકે અમે એ લગેજ રેક પાછી ફિટ કરી છે. એટલું જ નહીં, અમે એ સિવાયની પણ બધી જ લગેજ રેક ચેક કરી છે જેથી આવી દુર્ઘટના ફરી ન બને.’
નસીબજોગે આ ઘટનામાં કોઈ પ્રવાસીને ઇજા નહોતી થઈ. આમ પણ છેલ્લાં થોડા દિવસથી એસી લોકલને લઈને વાદ-વિવાદ ચાલી રહ્યાં છે એમાં વેસ્ટર્ન લાઇનમાં તો પીક અવર્સમાં પ્રવાસીઓના ધસારાને લીધે ઘણી વાર દરવાજા બંધ નથી થતા અને આરપીએફના જવાનોએ આવીને મધ્યસ્થી કરવી પડે છે.