27 November, 2021 10:45 AM IST | Mumbai | Gujarati Mid-day Correspondent
થાણેમાં ૯૧ ટકા લોકોમાં કોરોના સામે લડવા ઍન્ટિ-બૉડીઝ મળ્યાં
ઇમારતોમાં રહેતા નાગરિકોમાં ૯૩.૩૨ ટકા તો ઝૂંપડપટ્ટીઓમાં રહેતા લોકોમાં ૮૮.૧૨ ટકા મળીને કુલ ૯૧ ટકા નાગરિકોમાં ઍન્ટિ-બૉડીઝ મળી આવ્યાં હતાં. ઝૂંપડપટ્ટીમાં રહેતા લોકોના સીરો સર્વે દરમ્યાન માત્ર ૪૮ ટકા લોકોનું વૅક્સિનેશન થયું હતું. આથી તેમનામાં ઓછાં ઍન્ટિ-બૉડીઝ મળી આવ્યાં છે. થાણેમાં આ સર્વે દરમ્યાન ૬૪ ટકા લોકોએ પહેલો અને ૩૭ ટકા લોકોએ વૅક્સિનનો બીજો ડોઝ લીધો હતો. પુરુષોમાં ૮૯.૬૧ ટકા તો સ્ત્રીઓમાં ૯૧.૯૧ ટકા ઍન્ટિ-બૉડીઝ મળી આવ્યાં છે.
પશ્ચિમી દેશોમાં કોવિડના કેસમાં ઉછાળો આવતાં બીએમસીએ રાજ્યના ટાસ્ક ફોર્સના સભ્યોને યુરોપ, અમેરિકા અને રશિયાથી આવતા પ્રવાસીઓ માટે જીનોમ સિક્વન્સિંગ રિપોર્ટ ફરજિયાત બનાવવાની માગણી કરી હતી. ક્રિસમસને અનુલક્ષીને દેશમાં વિદેશી પ્રવાસીઓનો ધસારો વધવાની સંભાવનાને લઈને તેમ જ પશ્ચિમી દેશોમાં કોવિડના કેસમાં નોંધાયેલા ઉછાળાને પગલે દેશમાં મહામારી ફેલાવાના ભયને ધ્યાનમાં લેતાં આ પગલું લેવાનો નિર્ણય લેવામાં આવ્યો છે.
ઍડિશનલ મ્યુનિસિપલ કમિશનર સુરેશ કાકાણીએ જણાવ્યું હતું કે ‘બીએમસી શહેરમાં કોવિડનો પ્રસાર રોકવા તમામ આવશ્યક પગલાં લઈ રહ્યું છે. કોવિડથી અસરગ્રસ્ત દેશોમાંથી મુંબઈ આવનારા પ્રવાસીઓનાં સૅમ્પલ્સ લેવાઈ રહ્યો છે. આ ઉપરાંત અન્ય દેશોમાં કોવિડના કેસ વધવા માટે જવાબદાર મનાતા કોવિડ વેરિઅન્ટ વિશે પણ માહિતી મગાવી છે.’
દરમ્યાન, શહેરમાં ગઈ કાલે ૩૪,૬૯૦ લોકોની કોરોનાની ટેસ્ટ કરાઈ હતી, જેમાં ૦.૬૬ ટકા પૉઝિટિવિટી સાથે ૨૩૦ કેસ નોંધાયા હતા. ગઈ કાલે મુંબઈમાં ૩ દરદીનાં મૃત્યુ થયાં હતાં, જેમાં એક દરદી ૪૦થી ૬૦ વર્ષની વયનો હતો તો બાકીના બે દરદી સિનિયર સિટિઝન હતા. આ સાથે શહેરમાં કુલ મૃત્યાંક ૧૬,૩૨૨ થયો છે. ગઈ કાલે નવા નોંધાયેલા કેસ કરતાં વધુ એટલે કે ૨૪૮ દરદી રિકવર થયા હતા. આ સાથે મુંબઈમાં નોંધાયેલા કોવિડના કુલ ૭,૬૨,૧૮૫ કેસમાંથી ૭,૪૦,૯૫૭ રિકવર થયા હતા. ઍક્ટિવ કેસનો આંકડો સહેજ ઘટીને ૨,૩૪૩ થયો હતો. શહેરમાં રિકવરીની ટકાવારી ૯૭ ટકા યથાવત્ રહી છે. કેસ ડબલિંગનો દર વધારા સાથે ૨,૬૮૨ દિવસ થયો છે. ગઈ કાલે એકેય સ્લમ અને બેઠી ચાલ સીલ નહોતી, જ્યારે પાંચ કે એનાથી વધુ કોરોનાના ઍક્ટિવ કેસ ધરાવતી ઇમારતોની સંખ્યા ૧૫ થઈ હતી. છેલ્લા ૨૪ કલાકમાં ૯૯૨ લોકોનું હાઈ રિસ્ક કૉન્ટૅક્ટ ટ્રેસિંગ કરાયું હતું, જેમાંથી ૫૩૧ હાઈ રિસ્ક કૉન્ટૅક્ટ મળી આવ્યા હતા.