09 April, 2026 08:30 AM IST | Mumbai | Gujarati Mid-day Correspondent
મેટ્રો 9નો પહેલો ખુશખુશાલ પ્રવાસી ગિરીશ બાવસકર.
મુખ્ય પ્રધાન દેવેન્દ્ર ફડણવીસના હસ્તે મંગળવારે ઉદ્ઘાટન બાદ બુધવારે વહેલી સવારથી મેટ્રો 9 પબ્લિક માટે શરૂ કરાઈ હતી.
દહિસર-ઈસ્ટથી કાશીગાવ વચ્ચે શરૂ થયેલી નવી મેટ્રોમાં મુસાફરી કરવા કાશીગાવ સ્ટેશન પર ગઈ કાલે સવારે ભારે ઉત્સાહનો માહોલ જોવા મળ્યો હતો. મીરા રોડના રહેવાસી ગિરીશ બાવસકર આ નવી લાઇન પર મુસાફરી કરનાર પ્રથમ પૅસેન્જર બન્યા હતા. સ્માર્ટફોન પર ડિજિટલ ટિકિટ લઈને મુસાફરી શરૂ કરનાર ગિરીશ બાવસકરે હર્ષ સાથે જણાવ્યું હતું કે ‘દહિસર-મીરા ભાઈંદરના લાખો રહેવાસીઓ માટે છેલ્લાં ૧૦ વર્ષનો લાંબો ઇન્તેજાર આખરે ખતમ થયો છે. આ મેટ્રો માત્ર એક ટ્રાન્સપોર્ટનું સાધન નથી, પરંતુ એક સપનું સાકાર થયું છે.’
મુંબઈ મેટ્રોપૉલિટન રીજન (MMR)ને જોડતી આ પહેલી મેટ્રો 9ને રેડ રેવલ્યુશન ગણાવતાં મુંબઈ મેટ્રોપૉલિટન રીજન ડેવલપમેન્ટ ઑથોરિટી (MMRDA)એ મુસાફરોના અનુભવો સોશ્યલ મીડિયા પર શૅર કર્યા હતા. ૨૦૩૧ સુધીમાં આ લાઇન પર રોજ ૧૧ લાખથી વધુ મુસાફરો મુસાફરી કરે એવો અંદાજ છે. આ ઉપરાંત મંડાલેથી ડાયમન્ડ ગાર્ડન વચ્ચે ગઈ કાલથી શરૂ થયેલી મેટ્રો 2Bમાં બેસીને એક મુસાફરે સૂર્યોદયનો ફોટો શૅર કર્યો હતો.
