ઘાટકોપર: માતા બની નિર્દયી, પતિએ ફરવા ન લઈ જતાં 3 વર્ષના પુત્રને માર્યો ઢોર માર, ફરિયાદ દાખલ

Ghatkopar women beat up 3-year-old son: લગભગ 4.30 વાગ્યાની આસપાસ, મૈસાદને પાડોશીનો ફોન આવ્યો કે તેને જાણ કરવામાં આવી હતી કે ગુડિયાએ ઘર છોડતા પહેલા તેના દીકરાને પાણીની પાઇપ વડે માર માર્યો હતો.

માર મારવાથી બાળકની પીઠ, ગરદન, ખભા અને કાન પર મોટા મોટા ચાંદા પડી ગયા હતા (તસવીર: મિડ-ડે)

મુંબઈના ઘાટકોપરમાં ત્રણ વર્ષના છોકરાને તેની માતા દ્વારા કથિત રીતે માર મારવા આવ્યો હોવાની ચોંકાવનારી ઘટના બની બની છે. આ બાળકને ગંભીર ઇજાઓ સાથે હૉસ્પિટલમાં દાખલ કરવામાં આવ્યો હતો. આરોપી માતાએ આ બાળકને પાણીના પ્લાસ્ટિકના પાઇપ વડે ખૂબ જ ખરાબ રીતે માર માર્યો હતો. બાળકને તેની પીઠ, ગરદન, ખભા અને કાન પર આ પાઇપની છાપ દેખાતી હતી. ઘાટકોપર પોલીસના જણાવ્યા અનુસાર, આ મામલો ત્યારે પ્રકાશમાં આવ્યો જ્યારે રાજાવાડી હૉસ્પિટલે તેમને આ ઘટના વિશે માહિતી આપી. છોકરાના પિતા, મૈસાદ ખાને તેની પત્ની ગુડિયા બાનુ ખાન વિરુદ્ધ ફરિયાદ નોંધાવી અને  તેમના પુત્રને માર મારવાનો આરોપ લગાવ્યો હતો.

ખાને પોલીસ નિવેદનમાં, મૈસાદે જણાવ્યું કે આ વિવાદ 26 જાન્યુઆરીએ શરૂ થયો જ્યારે ગુડિયાએ તેને અને તેમના પુત્રને બહાર ફરવા લઈ જવાની માગ કરી. મૈસાદ, ધંધાકીય ખોટને કારણે આર્થિક રીતે સંઘર્ષ કરી રહ્યો છે, તેણે ગુડિયાને પૈસાની વ્યવસ્થા ન થાય ત્યાં સુધી થોડા દિવસો રાહ જોવાની વિનંતી કરી. આનાથી બન્ને વચ્ચે ઝઘડો થયો, જે પછી મૈસાદ કામ પર નીકળી ગયો. લગભગ 4.30 વાગ્યાની આસપાસ, મૈસાદને પાડોશીનો ફોન આવ્યો કે તેને જાણ કરવામાં આવી હતી કે ગુડિયાએ ઘર છોડતા પહેલા તેના દીકરાને પાણીની પાઇપ વડે માર માર્યો હતો. બાન્દ્રા કુર્લા કોમ્પ્લેક્સમાંથી ઘરે દોડી જઈને, મૈસાદે ગંભીર રીતે ઇજાગ્રસ્ત તેના પુત્રને રૂમના એક ખૂણામાં પડેલો જોયો. તે તરત જ બાળકને રાજાવાડી હૉસ્પિટલમાં લઈ ગયો, જ્યાં તેની ઈજાઓની ગંભીરતાને કારણે ડૉક્ટરોએ તેને ટ્રોમા વોર્ડમાં ખસેડવાની ભલામણ કરી.

હૉસ્પિટલ પ્રશાસને ઘાટકોપર પોલીસને માહિતી આપી અને મૈસાદનું નિવેદન નોંધ્યા બાદ સોમવારે ગુડિયા વિરુદ્ધ એફઆઈઆર દાખલ થઈ. આરોપી મહિલા પર ભારતીય ન્યાય સંહિતાની કલમ 118(2) (ખતરનાક હથિયારોનો ઉપયોગ કરીને ગંભીર ઇજા પહોંચાડવી) અને જુવેનાઇલ જસ્ટિસ (બાળકોની સંભાળ અને સંરક્ષણ) અધિનિયમ, 2015 ની કલમ 75 (બાળક પર હુમલો કરવો) હેઠળ ગુનો નોંધવામાં આવ્યો હતો. સમગ્ર ઘટનાના સાક્ષી પાડોશીઓના નિવેદનો પણ નોંધાયા છે.

આરોપી મહિલાને પોલીસ સ્ટેશનમાં બોલાવવામાં આવી હતી અને મંગળવારે સવારે પૂછપરછ માટે હાજર થઈ હતી. "તેની સામે લાગુ કરાયેલા બન્ને વિભાગો `સાત વર્ષથી ઓછી સજા`ની શ્રેણીમાં આવતા હોવાથી, અમે તેની સામે નોટિસ જાહેર કરી છે. આરોપી તપાસમાં સહકાર આપવા સંમત થઈ છે. જો જરૂરી હોય તો, તેણીની ધરપકડ કરવામાં આવશે, ”તપાસ સાથેના એક અધિકારીએ જણાવ્યું હતું. મૈસાદે મિડ-ડેને કહ્યું, “હું ક્યારેય મારી પત્ની વિરુદ્ધ એફઆઈઆર નોંધાવવા માગતો ન હતો. તે હૉસ્પિટલ પ્રશાસને અને મારા પડોશીઓએ કર્યું હતું. તે મારી પત્ની અને મારા પુત્રની માતા છે. હું ઈચ્છતો નથી કે કોઈ પણ રીતે તેણીને કોઈ નુકસાન પહોંચે.”