ફ્રૉડમાં ગુમાવેલા ૧૦ લાખ રૂપિયા પાછા મેળવવા બીજા ફ્રૉડમાં ફસાઈ મહિલા, બીજા ૨૯ લાખ રૂપિયા ગુમાવ્યા

સાઇબર-છેતરપિંડીની ફરિયાદ કરવા થાણેની મહિલા પોલીસ-સ્ટેશન પર ગઈ ત્યારે બોગસ ACPની જાળમાં ફસાઈ

પ્રતીકાત્મક તસવીર

થાણે કોલશેત રોડ પર રહેતી અને શૅરટ્રેડિંગ કંપનીમાં ફાઇનૅન્સ મૅનેજરની નોકરી કરતી ૩૫ વર્ષની મહિલા સાથે અસિસ્ટન્ટ કમિશનર ઑફ પોલીસ (ACP)ની ખોટી ઓળખ આપી બે લોકોએ ૨૯ લાખ રૂપિયા પડાવી લીધા હોવાની ફરિયાદ શુક્રવારે કાપુરબાવડી પોલીસ-સ્ટેશનમાં નોંધાઈ હતી જેના આધારે પોલીસે તાત્કાલિક તપાસ હાથ ધરી શૈલેશ રામગુડે સહિત બોગસ ACP રણજિત કદમની ધરપકડ કરી હતી. મહિલા સાથે ૧૦ લાખ રૂપિયાની સાઇબર-છેતરપિંડી થઈ હતી જેની ફરિયાદ કરવા તે પોલીસ-સ્ટેશનમાં ગઈ હતી અને ત્યાં તેની ઓળખ શૈલેશ સાથે થઈ હતી. તેણે સાઇબર-છેતરપિંડીમાં ગુમાવેલા પૈસા તાત્કાલિક કાઢી આપવાને બહાને ઑગસ્ટ ૨૦૨૩થી હાલ સુધીમાં અલગ-અલગ બહાને પૈસા લીધા હોવાનો આરોપ ફરિયાદમાં કરવામાં આવ્યો છે.

પોલીસનું નામ વાપરી છેતરપિંડી કરનારા બન્ને આરોપીની અમે ધરપકડ કરી છે એમ જણાવતાં કાપુરબાવડી પોલીસ-સ્ટેશનના સિનિયર ઇન્સ્પેક્ટર શ્રીરામ પોલે ‘મિડ-ડે’ને કહ્યું હતું કે ‘મહિલાએ મે ૨૦૨૩માં ક્રિપ્ટોકરન્સી ફ્રૉડમાં આશરે ૧૦ લાખ રૂપિયા ગુમાવ્યા હતા જેની પ્રાથમિક ફરિયાદ તેણે ૧૯૩૦ નંબર પર કરી હતી. ત્યાર બાદ તે અમારી પાસે ફરિયાદ નોંધાવવા આવી હતી ત્યારે પોલીસ-સ્ટેશનની બહાર તેની ઓળખ શૈલેશ રામગુડે સાથે થઈ હતી. શૈલેશે મહિલાને કહ્યું હતું કે કાપુરબાવડી પોલીસ-સ્ટેશનના ACP સમીર નાઈક તેના ઓળખીતા છે જે સાઇબર-છેતરપિંડીમાં ગુમાવેલા પૈસા જલદી મેળવી આપશે, પણ એના માટે ACP સમીર નાઈકને પૈસા આપવા પડશે. મહિલા પૈસા આપવા તૈયાર થઈ હતી. ત્યાર બાદ તેમણે બહાર મળવાનું નક્કી કર્યું હતું. દરમ્યાન ACP સમીર નાઈક તરીકે ઓળખ આપનારી વ્ય​ક્તિ પોલીસના યુનિફૉર્મમાં તેને મળી હતી અને પૈસા કઢાવી આપવા માટે પહેલાં અઢી લાખ રૂપિયા લીધા હતા. આશરે બે મહિના સુધી પોતાના પૈસા પાછા ન મળતાં તેણે શૈલેશની પૂછપરછ કરી ત્યારે તેણે કહ્યું હતું કે તારા પૈસા ગુજરાત, ઉમરગામની એક બૅન્કમાં છે, ત્યાંથી પૈસા પાછા મેળવવા માટે વધુ પૈસા ભરવા પડશે. આવા ખોટા વાયદાઓ કરી આશરે દોઢ વર્ષ સુધી ૨૯ લાખ રૂપિયા લેવામાં આવ્યા હતા. એ છતાં પણ પોતાના પૈસાની કોઈ ભાળ ન લાગતાં ફરિયાદી મહિલાએ ACP સમીર નાઈકના વિશે વધુ માહિતીઓ મેળવી ત્યારે તેને માલૂમ થયું હતું કે આવો કોઈ અધિકારી જ નથી અને ACP સમીર નાઈકના નામે ઓળખ આપનારનું સાચું નામ રણજિત કદમ છે. અંતે તેણે ઘટનાની ફરિયાદ અમારી પાસે નોંધાવી હતી. આ કેસમાં ગઈ કાલે અમે બન્ને આરોપીની ધરપકડ કરી છે અને વધુ તપાસ હાથ ધરવામાં આવી છે.’