ઑનલાઇન ઍપથી બાઇક બીજા રાજ્યમાં મોકલવા માગતા હો તો રહેજો સાવધાન

પોલીસે ગઈ કાલે મલાડમાંથી ૩૫ વર્ષના લક્ષ્મણ ધોત્રે નામના આરોપી પાસેથી ૧૪ બાઇક જપ્ત કરી છે.

આરોપી ચોર સાથે કુરાર પોલીસની ટીમ.

મલાડ-ઈસ્ટમાં આવેલી કુરાર વિલેજ પોલીસે પોર્ટલ નામની ઍપ બનાવીને એક રાજ્યમાંથી બીજા રાજ્યમાં મોકલવા આપનારા કસ્ટમરોની બાઇક ચોરી કરવાવાળી ગૅન્ગના એક આરોપીની ધરપકડ કરી છે. પોલીસે ગઈ કાલે મલાડમાંથી ૩૫ વર્ષના લક્ષ્મણ ધોત્રે નામના આરોપી પાસેથી ૧૪ બાઇક જપ્ત કરી છે. કુરાર પોલીસ-સ્ટેશનના સિનિયર ઇન્સ્પેક્ટર શશિકાંત જગદાળેએ કહ્યું હતું કે ‘આરોપીએ વાહન ટ્રાન્સપોર્ટ કરવા માટેની બોગસ પોર્ટલ ઍપ બનાવી હતી. મલાડમાં રહેતી એક વ્યક્તિએ પોતાની બાઇક રાજસ્થાન મોકલવા માટે આરોપીને સોંપી હતી, પરંતુ એ રાજસ્થાન પહોંચી નહોતી એટલે ૧૯ જૂને બાઇકચોરીની ફરિયાદ નોંધાવી હતી. અમે બાદમાં આરોપીની ધરપકડ કરી હતી. અમારી તપાસમાં જણાયું હતું કે બોગસ પોર્ટલ ઍપ બનાવીને બાઇકની ચોરી કરીને વેચી નાખતી ઇન્ટરસ્ટેટ ગૅન્ગ સક્રિય છે. આરોપીઓ લોકોનો સામેથી ફોન કરીને અથવા ઍપના માધ્યમથી બાઇક બીજા રાજ્યમાં મોકલવા માટે સંપર્ક કરતા હતા. આથી આવી રીતે કોઈને ફોન આવે તો સાવધાન. તમારી બાઇક ચોરી થઈ શકે છે.’