23 May, 2026 10:01 AM IST | Saputara | Gujarati Mid-day Correspondent
હિલ-સ્ટેશન પર જાણે કે કુદરત મહેરબાન થઈ હોય એમ ડુંગરો પર ધુમ્મસની ચાદર
ગુજરાતમાં કાળઝાળ ગરમી પડી રહી છે ત્યારે બીજી તરફ ગુજરાતના હિલ-સ્ટેશન સાપુતારામાં વાતાવરણ બદલાતાં છેલ્લા બે દિવસથી ઠંડક ફેલાઈ છે અને આ હિલ-સ્ટેશન પર કાશ્મીર જેવો માહોલ સર્જાયો છે. ઠંડક સાથે ખુશનુમા વાતાવરણ સર્જાતાં સહેલાણીઓ રોમાંચ અનુભવી રહ્યા છે.
ગઈ કાલે સાપુતારાના વાતાવરણમાં પલટો આવ્યો હતો અને સવારે આશરે ૨૩ ડિગ્રી તાપમાન નોંધાયું હતું.
હિલ-સ્ટેશન પર જાણે કે કુદરત મહેરબાન થઈ હોય એમ ડુંગરો પર ધુમ્મસની ચાદર પથરાતાં મિની કાશ્મીર જેવો માહોલ સર્જાયો હતો. ભરઉનાળે મોસમ બદલાતાં ઠંડીનો અહેસાસ થઈ રહ્યો છે જેને કારણે સ્થાનિક લોકો સાથે સહેલાણીઓમાં પણ ખુશી પ્રસરી છે. સવારના સમયે થોડી ઠંડીના અહેસાસ સાથે ખુશનુમા વાતાવરણ સર્જાતાં સહેલાણીઓને મોજ પડી છે અને ગરમીમાંથી જાણે કે છુટકારો મળ્યો હોય એવો અનુભવ કરી રહ્યા છે. સાપુતારામાં આવેલા જુદા-જુદા નાના-મોટા પહાડ, રસ્તાઓ અને વ્યુ-પૉઇન્ટ્સ ધુમ્મસથી ઢંકાઈ ગયા છે. ગુલાબી ઠંડકમાં વહેલી સવારે ફરવાની સહેલાણીઓને મજા આવી રહી છે. સહેલાણીઓ વહેલી સવારે આ નજારો માણવા બહાર નીકળી પડ્યા હતા. પ્રકૃતિના આ નજારાએ સહેલાણીઓનાં મન મોહી લીધાં હતાં અને સાપુતારા મિની કાશ્મીર જેવી ફીલ આપી રહ્યું છે.
