21 January, 2020 09:57 AM IST | Ahmedabad
મોઢેરા સૂર્યમંદિર
ગુજરાતના મુખ્ય પ્રધાન વિજયભાઈ રૂપાણી ૨૧ જાન્યુઆરીના દિવસે મહેસાણા જિલ્લાના સુપ્રસિદ્ધ તીર્થ સૂર્યમંદિર મોઢેરાના પરિસરમાં દ્વિદિવસીય ઉત્તરાર્ધ ઉત્સવનો સાંજે 6:30 વાગ્યે શુભારંભ કરાવશે. રાજ્ય સરકારના રમતગમત યુવા અને સાંસ્કૃતિક પ્રવૃત્તિઓ વિભાગ તેમ જ સંગીત નાટક અકાદમી દ્વારા જિલ્લા વહીવટી તંત્રના સહયોગથી તા.૨૧ અને ૨૨ જાન્યુઆરી દરમિયાન આ ઉત્તરાર્ધ ઉત્સવ યોજાઈ રહ્યો છે. પ્રાચીન સંસ્કૃતિમાં સૂર્યદેવતાની પૂજાઅર્ચના માટે જ સ્વતંત્ર મંદિરોનું નિર્માણ થતું હતું.
આ પણ વાંચો : અમદાવાદ : સાબરમતી સેન્ટ્રલ જેલ બની ગયું કૉલ સેન્ટર
એમાં ગુજરાતમાં સોલંકી રાજવી યુગમાં ઈ. સ.૧૦૨૬માં મોઢેરામાં આ સૂર્યમંદિર રેતિયા પથ્થર પર નિર્માણ પામેલું છે. ત્રણ ભાગમાં નિર્મિત આ મંદિરમાં સૂર્યકુંડ, સભામંડપ અને નૃત્યમંડપમાં રામાયણ-મહાભારતનાં કથાનક શિલ્પો તેમ જ કૃષ્ણલીલા અને સુંદર સ્ત્રીશિલ્પો કંડારવામાં આવેલાં છે. ભારતમાં કોણાર્ક, મંદસૌર, લાટપુર અને કાશ્મીરમાં માર્તંડ સૂર્યમંદિરો સાથે ગુજરાતના આ મોઢેરા સૂર્યમંદિરનું પણ સૂર્યોપાસના માટે અદકેરું મહત્વ છે.