ગુજરાતમાં અભરે ભરાય એટલું રિઝલ્ટ જાહેર થયું ધોરણ ૧૨ના સામાન્ય પ્રવાહનું

૯૩.૦૭ ટકા સ્ટુડન્ટ્સ પાસ થયા, સાયન્સ પ્રવાહનું ૮૩.૫૧ ટકા રિઝલ્ટ : સામાન્ય પ્રવાહની ૨૦૦૫ સ્કૂલોમાં એક પણ સ્ટુડન્ટ નાપાસ ન થયો

પ્રતીકાત્મક તસવીર

ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ફેબ્રુઆરી અને માર્ચ ૨૦૨૫ દરમ્યાન લેવાયેલી ધોરણ ૧૨ સામાન્ય પ્રવાહની પરીક્ષાનું ગઈ કાલે અભરે ભરાય એટલું પરિણામ જાહેર થયું હતું, જેમાં છેલ્લાં ૧૦ વર્ષમાં સૌથી વધુ ૯૩.૦૭ ટકા અને ધોરણ ૧૨ સાયન્સ પ્રવાહનું છેલ્લાં ૯ વર્ષમાં સૌથી વધુ ૮૩.૫૧ ટકા રિઝલ્ટ જાહેર થતાં સ્ટુડન્ટ્સ ખુશખુશાલ થયા છે. ઊંચા રિઝલ્ટને કારણે સ્ટુડન્ટ્સની સાથે-સાથે તેમના પેરન્ટ્સ અને શાળાઓના શિક્ષકો અને સંચાલકો ખુશ થયા છે. એટલું જ નહીં, મૅ​ક્સિમમ રિઝલ્ટને કારણે કૉલેજવાળા પણ ખુશ ગયા છે, કેમ કે મોટા ભાગની બેઠકો ભરાઈ જશે એવી આશા છે.