મૅરેજનાં પાંચ વર્ષ પછી બાળક કરીએ તો ખામીવાળું આવી શકે?

મારી ઉંમર ૨૯ વર્ષની છે, અમે ઈચ્છીએ છીએ કે પહેલાં અમે અમારી સેક્સલાઇફને બરાબર માણીએ અને એ પછી બચ્ચાઓની પળોજણમાં પડીએ

પ્રતીકાત્મક તસવીર

મારી ઉંમર ૨૯ વર્ષની છે, અમે ઈચ્છીએ છીએ કે પહેલાં અમે અમારી સેક્સલાઇફને બરાબર માણીએ અને એ પછી બચ્ચાઓની પળોજણમાં પડીએ. વાઇફ પણ આવું માનતી હોવાથી મેરેજને ચાર વર્ષ થયા એ પછી પણ અમે ફૅમિલી-પ્લાનિંગમાં નથી પડ્યા પણ હમણાં બે ઘટના એવી ઘટી કે જેણે અમને બન્નેને ટેન્શ કરી દીધાં. અમારાં બે સગાંને ત્યાં બાળકો જન્મ્યાં જેમાંથી એકને સાંભળવામાં તકલીફ છે તો બીજાને સ્પાઇનમાં. આ બન્ને બાળકના પેરન્ટ્સે પણ મેરેજના પાંચેક વર્ષ પછી ફૅમિલી પ્લાનિંગ કર્યુ હતું અને એ પહેલાં સેક્સ લાઇફને બરાબર માણી હતી. શું વધુ વાર સેક્સ કરીને સ્પર્મ વહાવી દઈશું તો બાળકના સ્વાસ્થ્ય પર અસર થાય?
દાદરના રહેવાસી

બાળકની હેલ્થનો આધાર એના પેરેન્ટ્સ કેટલી વાર સેક્સ માણે છે એના પર નહીં, પણ પેરન્ટ્સના જિન્સ પર આધારિત છે. હસબન્ડ કે વાઇફમાં જો કોઈ જિનેટિક ખામી હોય કે પછી પ્રેગન્નસી દરમ્યાન કોઈ પ્રકારના કૉમ્પ્લિકેશન્સ ઊભા થયાં હોય તો બાળક નબળું કે ખામીયુક્ત આવી શકે છે. બાળકની હેલ્થ અને વધારે પડતાં સેક્સને કંઈ લાગતું-વળગતું નથી પણ હા, સ્મોકિંગ, ચ્યુઇંગ ટોબેકો કે પછી આલ્કોહોલોનું સેવન કરવાની આદત લાંબા સમયથી હોય તો બાળકમાં જિનેટિક ખામી આવી શકે છે. આ ઉપરાંત પ્રેગ્નન્સી દરમ્યાન માતા જો સંતુલિત આહાર ન લેતી હોય અને રોજિંદા ખોરાકમાં જંક ફૂડની માત્રા વધારે હોય તો પણ બાળકના વિકાસમાં તકલીફ આવી શકે છે. 
તમારા ધ્યાન પર એક બીજી પણ વાત મૂકવાની. બાળકના ગ્રોથને અને પેરેન્ટ્સની ઉંમરને સીધો સંબંધ છે. મોટી ઉંમરે બાળક પેદા થાય ત્યારે બચ્ચાના ગ્રોથમાં તકલીફ થવાની શક્યતા રહે છે. પેરેન્ટ્સ બનવાની આદર્શ અવસ્થા માતાની ઉંમર એકવીસ-બાવીસની ગણાય છે તો પુરુષ પચ્ચીસ વર્ષે પિતા બને એ આવકાર્ય છે પણ આજકાલ આ વાતને નવદંપતિઓ ગણકારતાં નથી. પર્સનલ એડવાઇઝ છે કે આપ જે ઉંમર પર છો એ ઉંમરે જ ફૅમિલી પ્લાનિંગની શરૂઆત કરી દેશો તો એ તમારા હિતમાં છે. હવે વર્ષ રાહ જોવાને બદલે તમે પેરેન્ટહૂડની તૈયારી શરૂ કરી દો.