શું તમને પણ સ્ક્રીન સામે જોતી વખતે બધું ધૂંધળું દેખાય છે?

ઑફિસનું કામ હોય કે સોશ્યલ મીડિયાનું સ્ક્રોલિંગ, કલાકો સુધી ટેક્નૉલૉજી સાથે ચીપકી રહેવાથી વિઝન બ્લર થવાની સમસ્યા થઈ રહી છે ત્યારે આવું થવા પાછળ કયાં પરિબળો જવાબદાર છે અને એમને રોકવા કેવાં પગલાં ભરવાં જોઈએ એ જાણી લો

પ્રતીકાત્મક તસવીર

આપણી સવાર હવે સોશ્યલ મીડિયાના નોટિફિકેશનથી પડે છે અને રાત ઑફિસના કામ કે વેબ-સિરીઝ સાથે પૂરી થાય છે. આપણે ડિજિટલ સ્પેસમાં એટલા વ્યસ્ત રહીએ છીએ કે આપણી આંખો સતત પિક્સેલ્સ અને બ્લુ લાઇટના સંપર્કમાં રહે છે. કલાકો સુધી લૅપટૉપ કે મોબાઇલ સામે તાકી રહેવાથી ઘણી વાર અચાનક બધું બ્લર અથવા ઝાંખું દેખાવા લાગે છે. આ કોઈ સામાન્ય થાક નથી પણ સતત સ્ક્રીન-યુઝને કારણે આંખો પર પડતી ગંભીર અસર છે.

આ છે મુખ્ય કારણો

જ્યારે આપણે કલાકો સુધી સ્ક્રીન સામે જોઈએ છીએ ત્યારે આંખોના સ્નાયુઓ પર સતત દબાણ રહે છે. નાના અક્ષરો વાંચવા અને ઇમેજ પર ફોકસ કરવા માટે આંખોએ સતત મહેનત કરવી પડે છે, જેના પરિણામે બ્લર વિઝનની સમસ્યા ઉદ્ભવે છે. ટેક્નિકલ ભાષામાં એને ડિજિટલ આઇ સ્ટ્રેન અથવા કમ્પ્યુટર વિઝન સિન્ડ્રૉમ કહેવાય.

સતત સ્ક્રીન-ટાઇમને લીધે આંખોમાં ડ્રાયનેસની સમસ્યા ઉદ્ભવે છે. સામાન્ય રીતે આપણે મિનિટમાં ૧૫-૨૦ વાર પલકારા મારીએ છીએ, પણ સ્ક્રીન સામે જોતી વખતે આ દર ઘટીને અડધો થઈ જાય છે. આંખો પટપટાવવાનું ઓછું થવાથી આંખમાં રહેલું નૅચરલ મૉઇશ્ચર સુકાઈ જાય છે, જે ઝાંખા દેખાવાનું મુખ્ય કારણ બને છે.

ડિજિટલ ઉપકરણોમાંથી નીકળતી હાઈ-એનર્જી બ્લુ લાઇટ સીધી રેટિના સુધી પહોંચે છે. આ પ્રકાશ લાંબા ગાળે આંખોના કોષોને નુકસાન કરી શકે છે અને જોવાની ક્ષમતામાં ક્લૅરિટી ઘટાડે છે.

ઘણી વાર આપણે મોબાઇલ ખૂબ નજીક રાખીએ છીએ અથવા લૅપટૉપ સામે નમીને બેસીએ છીએ. સ્ક્રીન અને આંખ વચ્ચેનું અયોગ્ય અંતર ફોકસિંગ પાવરને વિખેરી નાખે છે, જે ટેમ્પરરી બ્લરનેસ લાવે છે.

કદાચ તમને ચશ્માંના નંબર હોય પણ તમે ચેક ન કરાવ્યા હોય. સામાન્ય સ્થિતિમાં બરાબર દેખાતું હોય, પણ સ્ક્રીન પર કામ કરતી વખતે આંખ પર ભાર વધતાં એ ખામી બ્લર વિઝન સ્વરૂપે બહાર આવે છે.

કેવી રીતે બચી શકાય?

જીવનમાં ટેકનૉલૉજી છોડવી શક્ય નથી, પણ એનો સ્માર્ટ ઉપયોગ ચોક્કસ કરી શકાય છે. દર ૨૦ મિનિટે ૨૦ ફુટ દૂર રહેલી કોઈ વસ્તુને ૨૦ સેકન્ડ માટે જુઓ. આનાથી આંખના સ્નાયુઓને આરામ મળે છે. આ ૨૦-૨૦-૨૦ રૂલ કારગત સાબિત થશે.

સભાનપણે આંખો પટપટાવતા રહો જેથી કુદરતી લુબ્રિકેશન જળવાઈ રહે. જો જરૂર જણાય તો ડૉક્ટરની સલાહ મુજબ આઇ ડ્રૉપ્સનો ઉપયોગ કરો.

તમારા ડિવાઇસની બ્રાઇટનેસ આસપાસના વાતાવરણ મુજબ ઍડ્જસ્ટ કરો. ના​ઇટ મોડ અથવા બ્લુ લાઇટ ફિલ્ટરનો ઉપયોગ કરવાની આદત પાડો.

કમ્પ્યુટરની સ્ક્રીન તમારી આંખોથી લગભગ ૨૫ ઇંચ દૂર અને થોડી નીચેની તરફ હોવી જોઈએ.

વર્ષમાં એક વાર આંખના નિષ્ણાત પાસે તપાસ કરાવો, જેથી કોઈ છૂપી સમસ્યા હોય તો વહેલી જાણી શકાય.

ડિજિટલ યુગમાં સાવચેતી જ શ્રેષ્ઠ ઉપાય છે. જો સ્ક્રીન બંધ કર્યા પછી પણ લાંબો સમય સુધી ઝાંખું દેખાતું હોય તો એને નજરઅંદાજ કરવાને બદલે એક્સપર્ટની સલાહ લેવી હિતાવહ છે.