19 March, 2019 08:31 PM IST |
આવી ગઈ હોળી ગીતનું એક દ્રશ્ય
રામ લીલા ફૅમ બોલીવુડ સિંગર ભૂમિ ત્રિવેદી પહેલીવાર રૅપ સોંગ કરવા જઈ રહ્યા છે. હોળી પર આધારિત આ રૅપ સોંગ આવતીકાલે રિલીઝ થવાનું છે. બોલીવુડ સિંગર ભૂમિ ત્રિવેદી સાથે આ ગીતમાં જાણીતા ડિજે ધ સ્પીન ડૉક્ટર અને વડોદરાના ગુજરાતી રૅપર એમસી ક્લાસિક પણ દેખાશે.
હોળી પર આધારિત આ ગીત મૂળ અવિનાશ વ્યાસના જાણીતા ગીત મારો દેવરિયો છે બાંકોનું રિમેક વર્ઝન છે. ગીતને સંજય મેરિયા ઉર્ફે ધ સ્પીન ડૉક્ટરે પ્રોડ્યુસ અને કમ્પોઝ કર્યું છે. સંજય મેરિયા કહે છે કે મારું આ પહેલું મોટું પ્રોડક્શન છે. હિપહોપ ડીજેઈંગ હું લાંબા સમયથી કરું છું, પરંતુ મારે મારી ભાષા એટલે કે ગુજરાતીથી જ કોઈ શરૂઆત કરવી હતી. મેં એક ટ્રેકની હિપ હોપ બીટ બનાવી અને ભૂમિ સાથે વાત કરી. તો ભૂમિએ કહ્યું કે આ તો રિમેક બની શકે. આ રીતે અમે પહેલું ગુજરાતી રૅપ સોંગ રેકોર્ડ કરવાનું નક્કી કર્યું. ખાસ વાત એ છે કે હિપ હોપ કલ્ચરને જાળવી રાખતા આ ગીત પણ ગલીઓમાં શૂટ થયું છે. આ ગીતને મુંબઈના જોગેશ્વરી વિસ્તારની ગલીઓમાં શૂટ કરાયું છે.
આ ગીતમાં રેપર્સને સામેલ કરવા માટે સંજય મેરિયાએ જુદા જુદા ગુજરાતી રૅપર્સના ડેમો મંગાવ્યા હતા. જેમાંથી વડોદરાના ગલી બૉય તરીકે ફેમસ એમસી ક્લાસિકની પસંદગી થઈ. આ રિમેક વર્ઝનમાં રૅપના તમામ લિરિક્સ ક્લાસિકે લખ્યા છે. ભૂમિ ત્રિવેદી પણ તેના જ શબ્દો પર રૅપ કરતા જોવા મળશે. આ પહેલા ક્લાસિક જાણીતી યુટ્યુબ ચેનલ ધ કોમેડી ફેક્ટરી માટે પણ ગુજરાતી રૅપ સોંગ રેકોર્ડ કરી ચૂક્યા છે. જો કે ક્લાસિક માટે પણ આ મોટો બ્રેક છે.
આ પણ વાંચોઃ Video:એક્ટર ભવ્ય ગાંધીએ વિદ્યાર્થીઓને કેમ કહ્યું 'બઉ ના વિચાર'?
ઉલ્લેખનીય છે કે સંજય મેરિયા મુંબઈના જાણીતા રેપર ડિવાઈન માટે 3 વર્ષ સુધી ડીજેઈંગ કરી ચૂક્યા છે. ડિવાઈન પર તાજેતરમાં જ ગલી બૉય નામની ફિલ્મ બની છે. ધ સ્પીન ડૉક્ટર, ભૂમિ ત્રિવેદી અને એમસી ક્લાસિકનું આ પહેલું ગુજરાતી રૅપ સોંગ આવતીકાલે ધૂળેટીના દિવસે રિલીઝ થશે. ગીત ધ દેસી હિપ હોપ ચેનલ પર રિલીઝ થવાનું છે. ધ દેસી હિપ હોપ ચેનલ અંડરગ્રાઉન્ડ હિપ હોપને પ્રમોટ કરતી દેશની સૌથી મોટી ચેનલ છે. જેના ઓનર પણ ગુજરાતી છે. હાર્દિક દવેની ચેનલ પર જ આવી ગઈ હોળી નામનું ગુજરાતી રૅપ સોંગ રિલીઝ થવાનું છે.