02 May, 2025 07:03 AM IST | Mumbai | Gujarati Mid-day Correspondent
સોહેલ ખાન
સલમાન ખાનના ભાઈ સોહેલ ખાને હાલમાં બહુ સારી પ્રૉપર્ટી ડીલ કરી છે. સોહેલ બાંદરામાં રહે છે અને અહીં જ તેની એક કમર્શિયલ પ્રૉપર્ટી છે. હાલમાં સોહેલે આ શૉપ ભાડે આપવાનો કરાર કર્યો છે જેને કારણે તેને ૬૦ મહિનામાં ૧૦.૩ કરોડ રૂપિયા જેટલી કમાણી થશે. સોહેલે આ શૉપ આયરિશ હાઉસ ફૂડ ઍન્ડ બેવરેજિસ પ્રાઇવેટ લિમિટેડને ભાડે આપી છે. આ પ્રૉપર્ટીનું માસિક ભાડું ૧૬.૮૯ લાખ રૂપિયાથી શરૂ થાય છે. આ ડીલના ડૉક્યુમેન્ટ્સ ઇન્સ્પેક્ટર જનરલ ઑફ રજિસ્ટ્રેશન (IGR) પાસે જમા કરાવવામાં આવ્યા છે.
આ ડૉક્યુમેન્ટમાં આપેલી માહિતી પ્રમાણે સોહેલ ખાનની આ કમર્શિયલ પ્રૉપર્ટી ગેસ્પર એન્ક્લેવમાં આવેલી છે. આ શૉપ તેણે ૨૦૦૯ના એપ્રિલમાં ૩.૧૧ કરોડ રૂપિયામાં ખરીદી હતી. સોહેલ ખાનની આ પ્રૉપર્ટી માટેની ડીલ ફાઇનલ કરતી વખતે ૬૦ લાખ રૂપિયાની સિક્યૉરિટી ડિપોઝિટ આપવામાં આવી છે તેમ જ સ્ટૅમ્પ-ડ્યુટી તરીકે ૨.૬૭ લાખ રૂપિયા અને રજિસ્ટ્રેશનના ૧૦૦૦ રૂપિયા ચૂકવવામાં આવ્યા છે. ડૉક્યુમેન્ટ પ્રમાણે આ પ્રૉપર્ટી ૧૨૯૦.૫૭ ચોરસ ફુટ જેટલો બિલ્ટ-અપ એરિયા ધરાવે છે.
આ ઍગ્રીમેન્ટ પ્રમાણે આ શૉપનું ૩૬ મહિના માટે માસિક ભાડું ૧૬,૮૯,૦૦૦ રૂપિયા ચૂકવવામાં આવશે અને પછી બાકીના ૨૪ મહિના માટે આ ભાડું વધારીને ૧૭,૭૩,૪૫૦ રૂપિયા નક્કી થયું છે.