09 November, 2026 04:11 PM IST | Mumbai | Gujarati Mid-day Correspondent
સલમાન ખાન અને ચિત્રાંગદા સિંહ
સલમાન ખાનની આગામી ફિલ્મ ‘માતૃભૂમિ : મે વૉર રેસ્ટ ઇન પીસ’નું ટ્રેલર હાલમાં રિલીઝ થયું છે. ફિલ્મનું ટ્રેલર સામે આવ્યા બાદ બે નાનકડા કલાકારો પણ ચર્ચામાં આવ્યા છે. ફિલ્મમાં તેઓ સલમાનના દીકરાઓનો રોલ કરી રહ્યા છે. આ બે બાળકોનું નામ અજઈ અને ઇવાર છે અને તેઓ રિયલ લાઇફમાં જાણીતાં ટીવી-સ્ટાર્સ શબ્બીર અહલુવાલિયા અને કાંચી કૌલના દીકરાઓ છે.
અજઈ અને ઇવારને આટલી મોટી ફિલ્મમાં કામ કરવાની તક કેવી રીતે મળી એનો ઘટનાક્રમ પણ રસપ્રદ છે. ‘માતૃભૂમિ : મે વૉર રેસ્ટ ઇન પીસ’નું ડિરેક્શન અપૂર્વ લાખિયા કરી રહ્યો છે અને તે શબ્બીર અને કાંચીનો બહુ જૂનો નજીકનો મિત્ર છે. આ કારણોસર ફિલ્મમાં જ્યારે સલમાનના દીકરાઓની ભૂમિકા ભજવવા માટે બે સગા ભાઈઓની જરૂર પડી ત્યારે અપૂર્વના મનમાં અજઈ અને ઇવારનાં નામ આવ્યાં. આ પછી શબ્બીર અને કાંચી પણ પોતાનાં બાળકોને આ ફિલ્મનો હિસ્સો બનાવવા માટે તૈયાર થઈ ગયાં.
અજઈ અને ઇવાર શુક્રવારે ફિલ્મના ટ્રેલર-લૉન્ચ કાર્યક્રમમાં પણ હાજર રહ્યા હતા. અહીં બન્નેએ સલમાન ખાન અને ચિત્રાંગદા સિંહ સાથે તસવીરો પડાવી હતી. આ દરમ્યાન સલમાન બન્ને બાળકો સાથે મસ્તી કરતો અને તેમના પર પ્રેમ વરસાવતો જોવા મળ્યો હતો.
