11 February, 2026 11:36 AM IST | Mumbai | Gujarati Mid-day Correspondent
રાની મુખરજી
રાની મુખરજીએ ફિલ્મ-ઇન્ડસ્ટ્રીમાં ૩૦ વર્ષ પૂરાં કર્યાં છે. આ લાંબી કરીઅરમાં તેણે શાહરુખ ખાન, આમિર ખાન અને સલમાન ખાન એમ ત્રણેય ખાન સુપરસ્ટાર્સ સાથે કામ કર્યું છે. હાલમાં રાનીએ આ ત્રણેય સુપરસ્ટાર્સ સાથે કામ કરવાનો અનુભવ શૅર કર્યો છે.
રાનીએ આમિર સાથેનો પોતાનો અનુભવ શૅર કરતાં કહ્યું હતું કે ‘મને જ્યારે ‘ગુલામ’ માટે સાઇન કરવામાં આવી ત્યારે પહેલાં તો હું ભારે સરપ્રાઇઝ થઈ હતી. આમિરના દરેક શૉટ પ્રત્યેના ડેડિકેશન, સંવેદનશીલતા, ગંભીરતા અને પર્ફોર્મન્સમાં ડૂબી જવાની આવડતથી હું બહુ પ્રભાવિત થઈ હતી. ‘ગુલામ’ મારી કરીઅરના શરૂઆતના દિવસોમાં કરી હતી અને એ સમય દરમ્યાન હું આમિર પાસેથી ઘણું શીખી છું.’
રાનીએ શાહરુખ ખાન સાથે ‘કુછ કુછ હોતા હૈ’ અને ‘ચલતે ચલતે’ જેવી ફિલ્મોમાં કામ કર્યું છે. શાહરુખના સ્વભાવ વિશે વાત કરતાં રાનીએ કહ્યું હતું કે ‘શાહરુખની સૌથી યાદગાર બાબત તેનો ઉષ્માભર્યો સ્વભાવ છે. શાહરુખ સૉફ્ટ અને સંવેદનશીલ ઊર્જા સાથે સેટ પર આવે છે. મેં જ્યારે તેની સાથે પહેલી વખત કામ કર્યું ત્યારે હું માત્ર ૧૮ વર્ષની હતી અને આજે પણ શાહરુખ મને ‘બેબી’ કહીને જ બોલાવે છે. આમિરની જેમ શાહરુખ પણ પોતાનો બેસ્ટ શૉટ આપવા પર સંપૂર્ણ ફોકસ રાખે છે અને સેટ પર મારા માટે ટીચર બની જાય છે.’
સલમાન ખાન અને રાનીએ ઘણી ફિલ્મોમાં કામ કર્યું છે. સલમાન સાથે કામ કરવાનો અનુભવ જણાવતાં રાનીએ કહ્યું હતું કે ‘સલમાનનું ક્રાફ્ટ પ્રત્યેનું ડેડિકેશન બિલકુલ અલગ પ્રકારનું છે. તે સ્વૅગ અને બિન્દાસ ઍટિટ્યુડ સાથે સેટ પર આવે છે. એવું લાગે કે તે હાજર નથી, પરંતુ હકીકતમાં તે સંપૂર્ણ રીતે પ્રેઝન્ટ રહે છે. સલમાન એટલો ગુડ-લુકિંગ છે કે સેટ પર આવતાં જ બધાની નજર તેના તરફ ખેંચાઈ જાય છે. તે કામને બહુ કૅઝ્યુઅલ રીતે લે છે, પરંતુ અત્યંત મહેનત કરે છે. ઘણા લોકો આને ઓળખી શકતા નથી, કારણ કે તે કોઈને પોતાના ઝોનમાં આવવા દેતો નથી. તે સતત સીન વિશે ચર્ચા કરતો રહે છે અને કંઈક નવું અજમાવતો રહે છે.’
