હાનિયા આમિરનાં મ્યુઝિક વીડિયોમાં રાખી સાવંત! લોકોએ કહ્યું "બુરખામાં પૅક કરી પાકિસ્તાન મોકલો”

હાનિયા અને રાખી વચ્ચે ગયા વર્ષે ઇન્સ્ટાગ્રામ પર પણ વાતચીત થઈ હતી. રાખીનો એક વીડિયો સામે આવ્યો હતો જેમાં તેણે હાનિયાને પૂછ્યું હતું કે શું તેના ઘરે રાખી માટે કોઈ જગ્યા છે. જવાબમાં, હાનિયાએ કહ્યું હતું કે તે ઍરપોર્ટ પર રાખીની રાહ જોશે.

રાખી સાવંત અને હાનિયા આમિર

પાકિસ્તાની અભિનેત્રી હાનિયા આમિરે ગુરુવારે તેનો નવો મ્યુઝિક વીડિયો રિલીઝ કર્યો હતો, પણ તેને ભારતના દર્શકોનું વધુ ધ્યાન ખેંચ્યું છે. આ ગીતને તેના ચાહકો તરફથી સારો પ્રતિસાદ મળી રહ્યો છે. જોકે, ભારતીય દર્શકો માટે વીડિયોના અંતે રાખી સાવંતનો અવાજ સાંભળવો એ મુખ્ય આકર્ષણ બની રહ્યું. વીડિયોના અંતે, રાખી સાવંતના અવાજમાં હાનિયા માટે એક મૅસેજ સંભળાય છે. તે કહે છે, "હાનિયા, મારી વહાલી, જરા પણ તણાવ ન લેતી. સમજાયું? કોઈ તણાવ નહીં. તું એક એન્જલ છે; તારા ચહેરા પર એક તેજસ્વી ચમક છે. લોકો તારી સુંદરતાથી ઈર્ષ્યા કરે છે. તું એક સિંહણ છે, હાનિયા—સમજી? ડરતી નહીં. જે ડરે છે તે મરે છે. તેમનો હિંમતભેર સામનો કર. આગળ વધતી રહે અને તેમને..." હાનિયા આમિરે વીડિયોના અંતે ઘણા લોકોનો આભાર માન્યો. વીડિયોના ક્રૅડિટ્સમાં સૌથી પહેલાં રાખી સાવંતનું નામ જોવા મળી રહ્યું છે.

હાનિયા આમિર અને રાખી સાવંત વચ્ચે ભૂતકાળમાં થયેલી વાતચીત

હાનિયા અને રાખી વચ્ચે ગયા વર્ષે ઇન્સ્ટાગ્રામ પર પણ વાતચીત થઈ હતી. રાખીનો એક વીડિયો સામે આવ્યો હતો જેમાં તેણે હાનિયાને પૂછ્યું હતું કે શું તેના ઘરે રાખી માટે કોઈ જગ્યા છે. જવાબમાં, હાનિયાએ કહ્યું હતું કે તે ઍરપોર્ટ પર રાખીની રાહ જોશે. જોકે, રાખી પાકિસ્તાન ગઈ નહીં, પરંતુ બન્ને સોશિયલ મીડિયા પર એકબીજાના સંપર્કમાં રહ્યા. હવે, હાનિયાના નવા મ્યુઝિક વીડિયોમાં રાખીનો અવાજ સામે આવતાં તેમની મિત્રતા ફરી ચર્ચામાં આવી છે.

સોશિયલ મીડિયા પર મિશ્ર પ્રતિક્રિયાઓ

હાનિયા અને રાખીના આ કોલૅબ પર સોશિયલ મીડિયા યુઝર્સે વિવિધ પ્રતિક્રિયાઓ આપી. એક યુઝરે ટિપ્પણી કરી, "રાખીને બુરખામાં પૅક કરો અને તેને પાકિસ્તાન મોકલી દો." અન્ય એક ઇન્સ્ટાગ્રામ યુઝરે લખ્યું, "પાકિસ્તાનીઓ માત્ર રાખીને જ પરવડી શકે તેમ છે." વધુ એક યુઝરે લખ્યું, "હાનિયા, મૂર્ખામીભરી હરકતો ન કર; તું પણ રાખી સાવંતની જેમ જ ઓવરઍક્ટિંગ કરે છે અને પાગલ જેવી છે—તમે બન્ને એકદમ યોગ્ય જોડી છો."

હાનિયા આમિરની ભારતીય ફિલ્મને લઈને વિવાદ

ગયા વર્ષે, હાનિયા આમિર પંજાબી ફિલ્મ સરદાર જી 3 (Sardaar Ji 3) દ્વારા ભારતીય ફિલ્મમાં ડૅબ્યુટ કરવાની હતી. જોકે, પહલગામ હુમલા બાદ ભારતમાં પાકિસ્તાની કલાકારોના કામ કરવા પર પ્રતિબંધ હોવાને કારણે આ ફિલ્મ ભારતમાં રિલીઝ થઈ શકી ન હતી. દિલજીત દોસાંજ અભિનીત સરદાર જી 3 માત્ર વિદેશમાં જ રિલીઝ કરવામાં આવી હતી. હવે, બન્ને કલાકારો ફરી ચર્ચામાં છે કારણ કે હાનિયાના નવા મ્યુઝિક વીડિયોમાં રાખી સાવંતનો અવાજ સામેલ છે, જેથી તે ભારતીય દર્શકો વચ્ચે ફરી ચર્ચાનો વિષય બની છે.