19 May, 2025 06:53 AM IST | Mumbai | Gujarati Mid-day Correspondent
પરેશ રાવલ
અક્ષયકુમાર, સુનીલ શેટ્ટી અને પરેશ રાવલની સુપરહિટ કૉમેડી ફ્રૅન્ચાઇઝી ‘હેરાફેરી 3’ને લઈને ચોંકાવનારા સમાચાર આવ્યા છે. ફિલ્મના ડિરેક્ટર પ્રિયદર્શને જાન્યુઆરી ૨૦૨૫માં જાહેરાત કરી હતી કે આ સિરીઝનો ત્રીજો ભાગ બનાવવાની સત્તાવાર રીતે શરૂઆત થઈ છે અને એમાં ફરી અક્ષયકુમાર, પરેશ રાવલ અને સુનીલ શેટ્ટીની ત્રિપુટી જોવા મળશે. જોકે હવે સમાચાર છે કે પરેશ રાવલે આ ત્રીજા ભાગમાં કામ કરવાની ના પાડી દીધી છે. આ સમાચાર સાંભળીને લોકોને આંચકો લાગ્યો છે, કારણ કે પરેશ રાવલે ભજવેલું બાબુરાવ ગણપતરાવ આપ્ટેનું કૅરૅક્ટર લોકોનું ફેવરિટ હતું. પરેશ રાવલે પણ આ સમાચાર સાચા હોવાનું સ્વીકાર્યું છે.
આ ફિલ્મ સાથે સંકળાયેલી વ્યક્તિએ માહિતી આપી છે કે ‘પરેશ રાવલ ‘હેરાફેરી 3’માં કામ કરવા માટે તૈયાર હતા, પણ શૂટિંગ દરમ્યાન સર્જનાત્મક મતભેદો થવાને કારણે તેમણે હવે આ ફિલ્મમાં કામ ન કરવાનો નિર્ણય લીધો છે. આ ફિલ્મનું જ્યારે પ્લાનિંગ થયું હતું ત્યારે એમાં અક્ષયકુમાર નહોતો પણ પછીથી તેણે આ ફિલ્મમાં કામ કરવાની હા પાડી દીધી હતી. હવે પરેશ રાવલને સમસ્યા છે, પણ આશા છે કે તેઓ પણ આ ફિલ્મમાં કામ કરવા માટે આખરે માની જશે.’
‘હેરાફેરી’ સિરીઝની પહેલી ફિલ્મ ૨૦૦૦માં અને બીજી ‘ફિર હેરાફેરી’ ૨૦૦૬માં રિલીઝ થઈ હતી અને હવે ત્રીજી ફિલ્મ બનાવવાનું પ્લાનિંગ ચાલી રહ્યું છે.