17 May, 2020 03:59 PM IST | Mumbai Desk | Gujarati Mid-day Online Correspondent
કરણ જોહરને મળ્યો દીકરા પાસેથી આવો જવાબ
જ્યારથી લૉકડાઉન શરૂ થયું છે, ત્યારથી ફિલ્મમેકર કરણ જોહર પણ ઘરે જ છે અને પોતાના બાળકોને પોતાનો બધો સમય આપી રહ્યા છે. જો કે, કરણ જોહર છેલ્લા કેટલાક દિવસથી ઇન્સ્ટાગ્રામ પર પોસ્ટ શૅર કરતાં પણ દેખાય છે કે હવે કરણ પોતાનો બધો સમય બાળકો સાથે મસ્તીમાં પસાર કરે છે. ઇન્સ્ટાગ્રામ પર પણ કરણ સતત પોતાના બાળકોના વીડિયો અને તસવીરો પોસ્ટ કરી રહ્યો છે. તો પોતાના બાળકોના આ વીડિયો દ્વારા પણ તે સતત ચર્ચામાં છવાયેલો રહ્યો છે અને ફરી એકવાર તેનો આવો જ એક વીડિયો ચર્ચાનો વિષય બન્યો છે.
હકીકતે, કરણ જોહરે ઇન્સ્ટાગ્રામ પર એક વીડિયો શૅર કર્યો છે, જેમાં તે પોતાના દીકરા યશ સાથે વાત કરે છે. આ દરમિયાન દીકરા યશએ એક એવો જવાબ આપ્યો કે જેને સાંભળીને તમે હસવાનું રોકી નહીં શકો અને આ ક્યૂટ વીડિયો તમને ગમશે પણ ખરો. આ વીડિયોમાં દેખાય છે કે કરણ જોહર પોતાના દીકરાને કેટલાક પ્રશ્નો પૂછે છે અને દીકરો પણ મસ્તીમાં તેના જવાબ આપે છે.
વીડિયોમાં દેખાય છે કે, કરણ જોહરે પોતાના દીકરા યશને તેનું નામ પૂછ્યું. તો તેણે જવાબ આપ્યો યશ કરણ જોહર. તેણે પોતાના શહેરનું નામ પણ સાચું જણાવ્યું, જો કે, કરણ જોહરે તેને દેશનું નામ પૂછ્યું તો યશે જવાબ આપ્યો, અમિતાભ બચ્ચન અને શાહરુખ ખાન. આ જવાબ પછી કરણ જોહર પોતે દંગ રહી ગયો, પછી તેણે દીકરાને જણાવ્યું કે દેશનું નામ ઇન્ડિયા છે.
કરણ જોહરે લૉકડાઉન શરૂ થયા બાદ ઘણાં વીડિયો શૅર કર્યા છે. જોકે, એકવાર તેણે એક વીડિયો રિટ્વીટ કર્યો જેમાં તેણે મસ્તીનો વીડિયો શૅર કરવા બદલ માફી પણ માગી હતી. કરણ જોહરે જે વીડિયો શૅર કર્યો હતો, તેમાં તે સેલિબ્રિટીઝ પર કટાક્ષ કરવામાં આવ્યો છે, જે મુશ્કેલીના સમયમાં પોતાની શાનદાર લાઇફ સોશિયલ મીડિયા પર બતાવતાં હતા, જેમાં મસ્તી મજાકના વીડિયો સામેલ છે. ત્યાર બાદ કરણ જોહરે પણ લખ્યું હતું કે, "આણે મને અંદર સુધી હલબલાવી દીધા અને મને એહસાસ થયો કે મારી ઘણી પોસ્ટ અન્ય કેટલાય લોકો માટે અસંવેદનશીલ છે... હું તેમની માફી માગું છું અને જણાવવા માગું છું કે મેં આ જાણીજોઇને નથી કર્યું પરંતુ એ પણ સ્પષ્ટ છે કે મેં ભાવનાત્મક દૂરદર્શિતા દર્શાવી નથી...માફી માગું છું."