15 May, 2020 05:31 PM IST | Mumbai | Gujarati Mid-day Correspondent
શૂજિત સરકારનું કહેવું છે કે તેને એક ખરાબ ટેવ છે કે ફિલ્મ તૈયાર થઈ જાય તો એને વહેલાસર રિલીઝ કરવામાં આવે. આ જ કારણ છે કે અમિતાભ બચ્ચન અને આયુષ્માન ખુરાનાની ‘ગુલાબો સિતાબો’ ડિજિટલ પ્લૅટફૉર્મ પર રિલીઝ કરવામાં આવશે. એ વિશે જણાવતાં શૂજિતે કહ્યું હતું કે ‘અમારી ફિલ્મ બની ગઈ અને અમે એને એપ્રિલમાં રિલીઝ કરવાના હતા. સામાન્ય રીતે મારી એક ખરાબ ટેવ છે કે ફિલ્મ તૈયાર થઈ જાય તો એને જલદી જ દર્શકોને દેખાડવા માટે હું આતુર બની જાઉં છું. આ કોરોનાની બીમારીનું સંકટ પણ હવે તો આપણા પર આવ્યું છે.’
ફિલ્મના પ્રોડ્યુસર રૉની લાહિરી સાથે ચર્ચા કર્યા બાદ આ નિર્ણય લીધો હોવાનું જણાવતાં શૂજિતે કહ્યું હતું કે ‘રૉનીએ મારી સાથે ચર્ચા કરી હતી કે આ ફિલ્મને જો ડિજિટલ પર રિલીઝ કરવામાં આવે તો તમારું શું કહેવું છે? એ વખતે મેં સ્પષ્ટતા રાખી હતી કે મને જેમ બને એમ વધુ લોકો સુધી પહોંચવું છે. તેમણે મને કહ્યું કે આ ફિલ્મ એકસાથે બસો દેશોમાં રિલીઝ કરવામાં આવશે. મેં આવા પ્રકારની રિલીઝ કદી પણ નહોતી કરી. આ પ્લૅટફૉર્મનો મને અનુભવ પણ નથી. ફિલ્મ તો તૈયાર છે અને એ વાતની જાણકારી નથી કે થિયેટર્સ ક્યારે શરૂ થશે. ડિજિટલ તો સિનેમાનું સહઅસ્તિત્વ છે. એમાં ભવિષ્ય પણ છે.’