10 July, 2026 01:54 PM IST | Mumbai | Gujarati Mid-day Correspondent
લક્ષ્મણ ઉતેકર, હૃતિક રોશન
ફિલ્મમેકર અને ડિરેક્ટર લક્ષ્મણ ઉતેકરે ‘લુકા છુપી’, ‘મિમી’ અને ‘છાવા’ જેવી સફળ ફિલ્મો દ્વારા ઇન્ડસ્ટ્રીમાં પોતાની અલગ ઓળખ બનાવી છે. હવે તેની આગામી ફિલ્મ ‘ઈઠા’માં શ્રદ્ધા કપૂર લીડ રોલમાં જોવા મળશે. હવે મળતી માહિતી પ્રમાણે લક્ષ્મણ ઉતેકરે ‘ઈઠા’ બાદની પોતાની આગામી ફિલ્મ માટે હૃતિક રોશનનો સંપર્ક કર્યો છે અને ‘ઈઠા’ રિલીઝ થયા બાદ તે તરત જ પોતાની આ નવી ફિલ્મ શરૂ કરવા ઇચ્છે છે. જોકે હાલમાં હૃતિકનું સંપૂર્ણ ધ્યાન ‘ક્રિશ 4’ના પ્રી-પ્રોડક્શન પર કેન્દ્રિત છે અને તેણે હજુ સુધી આ ઑફર અંગે કોઈ પ્રતિસાદ આપ્યો નથી.
સાઉથની સ્ટાર શ્રીલીલાએ હાલમાં લંડનમાં વિમ્બલ્ડનના ક્વાર્ટર ફાઇનલ મુકાબલા દરમ્યાન હાજરી આપી હતી. શ્રીલીલાએ આ ખાસ ઇવેન્ટની કેટલીક ઝલક સોશ્યલ મીડિયા પર પણ શૅર કરી હતી. વિમ્બલ્ડનમાં શ્રીલીલા બૉસ લેડી લુકમાં જોવા મળી હતી. આ ટુર્નામેન્ટ માટે તેણે પાવર ડ્રેસિંગ પસંદ કર્યું હતું અને નેવી બ્લુ પૅન્ટ-સૂટમાં તે ખૂબ જ આકર્ષક લાગી રહી હતી. આ ઇવેન્ટમાં શ્રીલીલા સ્ટૅન્ડ્સમાં બેસીને ક્વાર્ટર ફાઇનલ મુકાબલાનો આનંદ માણતી જોવા મળી હતી.
કરીના કપૂર ગ્રીસમાં પરિવાર સાથે વેકેશન માણી રહી છે અને ત્યાંથી તેણે સોશ્યલ મીડિયા પર પોતાની મેકઅપ વગરની તસવીરો શૅર કરી છે. કરીનાએ શૅર કરેલી તસવીરોમાં માથા પર સ્ટાઇલિશ બૅન્ડના બાંધેલો છે. કરીનાનો આ મેકઅપ વગરનો લુક તેના ફૅન્સને બહુ પસંદ પડ્યો છે અને તેમણે કરીનાના આ આત્મવિશ્વાસનાં વખાણ કર્યાં છે.
અનુપમ ખેર અત્યારે અયોધ્યામાં તેમની પાંચસો બાવનમી ફિલ્મ ‘શ્રી રામભૂમિ’નું શૂટિંગ કરી રહ્યા છે. આ ફિલ્મ રામ મંદિર બનવા સુધીની સફર પર આધારિત છે. ગઈ કાલે અનુપમ ખેરનો આ ફિલ્મના સેટ પરનો ફોટો સામે આવ્યો હતો જેમાં તેમનો લુક રામ મંદિરના નિર્માણ માટે જીવન અર્પી દેનારા વિશ્વ હિન્દુ પરિષદના સદ્ગત અશોક સિંઘલ સાથે મળતો આવે છે.
