12 June, 2019 08:28 PM IST | મુંબઈ
સલમાન ખાનની લેટેસ્ટ ફિલ્મ ભારત બોક્સ ઓફિસ પર જબરજસ્ત હિટ રહી છે. આ વખતે પણ ફેન્સે ભારતને અઢળક કમાણી કરાવી સલમાન ખાનને ઈદી આપી છે. આ સાથે જ સલમાન ખાનની આગામી ઈદ પર આવનારી ફિલ્મની પણ જાહેરાત થઈ ચૂકી છે. 2020માં ઈદ પર સલમાન ખાનની ફિલ્મ ઈન્શાહ અલ્લાહ રજૂ થશે. આ ફિલ્મમાં સલમાન ખાનની સામે લીડ રોલમાં આલિયા ભટ્ટ દેખાશે.
ધર્મેન્દ્ર ભજવી શકે છે ભૂમિકા
જો કે ઈન્શાહ અલ્લાહ પહેલા સલમાન ખાનની દબંગ સિરીઝની ત્રીજી ફિલ્મ રજૂ થવાની છે. આ ઉપરાંત સલમાન ટાઈગર સિરીઝની ત્રીજી ફિલ્મમાં પણ કામ કરી રહ્યા છે. જો કે હાલતમાં જ દબંગ થ્રીને લઈ એક સમાચાર સામે આવ્યા છે. સલમાન ખાનની દબંગ થ્રીમાં સલમાનના પિતાનો રોલ ધર્મેન્દ્ર કરી શકે છે. બોલીવુડના હીમેન દબંગ થ્રીમાં સલમાન ખાનના પિતાનું પાત્ર ભજવતા દેખાઈ શકે છે. ઉલ્લેખનીય છે કે દબંગ સિરીઝની પહેલી બંને ફિલ્મોમાં વિનોદ ખન્નાએ સલમાનના પિતાનો રોલ કર્યો હતો. જો કે વિનોદ ખન્નાના નિધન બાદ તેમનું સ્થાન ધર્મેન્દ્ર લઈ શકે છે. ઉલ્લેખનીય છે કે વિનોદ ખન્નાએ વોન્ટેડમાં પણ સલમાન ખાનના પિતાની ભૂમિકા ભજવી હતી.
આ પણ વાંચોઃ સલમાન ખાને બદલી અક્ષય કુમારની ફિલ્મ 'સુર્યવંશી'ની તારીખ
પ્રભુદેવા કરી રહ્યા છે ડિરેક્ટ
ત્યારે હવે દબંગ સિરીઝમાં ધર્મેન્દ્રની એન્ટ્રી થઈ શકે છે. જો કે હજી સુધી આ મામલે કોઈ સત્તાવાર જાહેરાત થઈ નથી. ધર્મેન્દ્ર કે અરબાઝ ખાન કોઈએ આ મામલે મગનું નામ મરી નથી પાડ્યું. દબંગ થ્રીને બોલીવુડના માઈકલ જેક્સન તરીકે ઓળખાતા ડાન્સર પ્રભુદેવા ડિરેક્ટ કરી રહ્યા છે. ત્યારે ઈન્ડસ્ટ્રીમાં ચર્ચા છે કે વિનોદ ખન્નાના બદલે ધર્મેન્દ્ર આ રોલ માટે પર્ફેક્ટ ચોઈસ છે. જો કે આ વાત કેટલી સાચી છે તે તો સમય આવ્યે જ ખબર પડશે.