22 May, 2022 09:49 AM IST | Mumbai | Gujarati Mid-day Correspondent
કાર્તિક આર્યનની અત્યાર સુધીની રિલીઝ થયેલી ફિલ્મોમાં ‘ભૂલભુલૈયા 2’ પહેલા દિવસે સૌથી વધુ બિઝનેસ કરનારી ફિલ્મ બની છે
કાર્તિક આર્યનની અત્યાર સુધીની રિલીઝ થયેલી ફિલ્મોમાં ‘ભૂલભુલૈયા 2’ પહેલા દિવસે સૌથી વધુ બિઝનેસ કરનારી ફિલ્મ બની છે. શુક્રવારે રિલીઝ થયેલી ફિલ્મનો પહેલા દિવસે ૧૪.૧૧ કરોડ રૂપિયાનો બિઝનેસ થયો છે. ૨૦૦૭માં આવેલી ‘ભૂલભુલૈયા’ની આ સીક્વલ છે. ‘ભૂલભુલૈયા 2’માં કાર્તિક સાથે કિયારા અડવાણી, તબુ અને રાજપાલ યાદવ લીડ રોલમાં છે. આ ફિલ્મને ટી-સિરીઝ, મુરાદ ખેતાની, અંજુમ ખેતાની અને ક્રિષન કુમારે સાથે મળીને પ્રોડ્યુસ કરી છે. કાર્તિકની અગાઉની ફિલ્મોના પહેલા દિવસના કલેક્શનની વાત કરીએ તો ૨૦૧૧માં આવેલી તેની પહેલી ફિલ્મ ‘પ્યાર કા પંચનામા’એ પહેલા દિવસે ૯૨ લાખનો બિઝનેસ કર્યો હતો. ત્યાર બાદ ૨૦૧૫માં આવેલી ‘પ્યાર કા પંચનામા 2’એ પહેલા દિવસે ૬.૮૦ કરોડનો બિઝનેસ કર્યો હતો. એ જ રીતે ૨૦૧૮માં આવેલી ‘સોનુ કે ટીટુ કી સ્વીટી’એ પહેલા દિવસે ૬.૪૨ કરોડ, ૨૦૧૯માં આવેલી ‘પતિ, પત્ની ઔર વોહ’એ ૯.૧૦ કરોડ, ૨૦૧૯માં આવેલી ‘લુકા છુપી’એ ૮.૦૧ કરોડ અને ૨૦૨૦માં આવેલી ‘લવ આજ કલ’એ ૧૨.૪૦ કરોડનું કલેક્શન કર્યું હતું, એથી કાર્તિકની અત્યાર સુધીની ફિલ્મોના પહેલા દિવસના કલેક્શનની સરખામણીમાં ‘ભૂલભુલૈયા 2’નો પહેલા દિવસનો બિઝનેસ ઘણો સારો છે. વીક-એન્ડમાં પણ આ ફિલ્મ સારો બિઝનેસ કરે એવી આશા છે.