ક્રેડિટ કાર્ડની સંખ્યા પાંચ કરોડને પારઃ એક વર્ષમાં 26 ટકા વૃદ્ધિ

ક્રેડિટ કાર્ડની સંખ્યા પાંચ કરોડને પારઃ એક વર્ષમાં 26 ટકા વૃદ્ધિ

Mumbai : ભારતમાં ક્રેડિટ કાર્ડ્સની સંખ્યા પાંચ કરોડને સ્પર્શી ગઈ છે. ગયા વર્ષે મે મહિનામાં આ સંખ્યા 3.8 કરોડની હતી, તેમ રિઝર્વ બેન્કના આંકડા દર્શાવે છે. નવા બિઝનેસની તક ખૂલવાના લીધે ક્રેડિટ કાર્ડમાં 26 ટકા વૃદ્ધિ થઈ છે, તેમ ઉદ્યોગના એક્ઝિક્યુટિવ્સનું કહેવું છે. 

ભારતમાં 82.4 કરોડ ડેબિટ કાર્ડ ધારકો છે
ભારત મુખ્યત્વે ડેબિટ કાર્ડ બજાર છે અને સિસ્ટમમાં 82.4 કરોડથી વધારે ડેબિટ કાર્ડ છે, એમ રિઝર્વ બેન્કના આંકડા જણાવે છે. યુનિફાઇડ પેમેન્ટ્સ ઇન્ટરફેસ (યુપીઆઇ) અને મોબાઇલ વોલેટ્સે પોલિસીના ઘડવૈયાઓનું ધ્યાન ખેંચ્યું છે અને ક્રેડિટ કાર્ડની વૃદ્ધિ દર્શાવે છે કે ગ્રાહકોમાં તેની લોકપ્રિયતા વધી રહી છે. 


પેમેન્ટ સોલ્યુશન કંપની Yapના સ્થાપક મધુસૂદન આરે જણાવ્યું હતું કે, "અમે પ્રતિ માસ લગભગ દસ લાખ ક્રેડિટ કાર્ડ જારી કરીએ છીએ અને વિશિષ્ટ ક્રેડિટ કાર્ડ યુઝર્સની સંખ્યા 2.5થી 3 કરોડ છે, જે દર્શાવે છે કે બજારે જબરજસ્ત વૃદ્ધિ દાખવી છે." 


Yap બેન્ક, એનબીએફસી અને ફિનટેક કંપનીઓ સહિતનાં બધા પ્રકારનાં પેમેન્ટ સોલ્યુશન્સ ઓફર કરે છે. કાર્ડ દીઠ થતી રકમના સંદર્ભમાં પણ જોઈએ તો તેમાં વૃદ્ધિ થઈ છે. 2018-'19માં ગ્રાહકોએ ક્રેડિટ કાર્ડ દ્વારા ₹6 લાખ કરોડની ચુકવણી કરી હતી, જે 2017-18ના ₹4.6 લાખ કરોડની તુલના 30 ટકા વધારે હતી. એચડીએફસી બેન્ક 1.2 કરોડ કાર્ડ સાથે આગેવાન છે અને તેના પછી આવતી સ્ટેટ બેન્ક ઓફ ઇન્ડિયા 87 લાખથી વધારે કાર્ડ ધરાવે છે. તેના પછીના ક્રમે આઇસીઆઇસીઆઇ બેન્ક અને એક્સિસ બેન્ક આવે છે. 

આ પણ જુઓ : કલમ 370 હટવા પર નેટીઝન્સ થયા છે ક્રેઝી, મીમ્સ જોઈને ખડખડાટ હસી પડશો.

એસબીઆઇ કાર્ડના ચીફ એક્ઝિક્યુટિવ ઓફિસર હરદયાલ પ્રસાદે જણાવ્યું હતું કે, "અમારી વૃદ્ધિ શક્ય થવાનું કારણ નવીનતાસભર અને ઇન્ડસ્ટ્રી ફર્સ્ટ પ્રોડક્ટ્સ, કો-બ્રાન્ડ પાર્ટનરશિપ્સ, કેશબેક્સ પ્રોગ્રામ્સ અને ટેક્‌નોલોજી છે. ઓક્ટોબર 2017માં અમે નવા કાર્ડ એક્વિઝિશન્સ માટે એસબીઆઇના ગ્રાહકોને ટેપ કર્યા હતા, જેના દ્વારા સુનિશ્ચિત કર્યું હતું કે અમારો પોર્ટફોલિયો સારી સ્થિતિમાં રહે."બેન્કો ઉપરાંત ઘણી ફિનટેક કંપનીઓ પણ સારી કામગીરી બજાવી રહી છે. આ સેક્ટરની સૌથી મોટી કંપનીઓમાં એક ક્રેડ છે, જેને ગયા વર્ષે કુણાલ શાહ દ્વારા શરૂ કરવામાં આવી હતી. આ સિવાય પ્રારંભિક તબક્કાની બીજી કેટલીક કંપનીઓ સ્લાઇસ પે, એન્કેશ છે. આ સિવાય તેની સાથે લાર્જ ટેક કંપનીઓ જેવી કે પેટીએમ, ફ્લિપકાર્ટ અને ઓલાએ પોતાના ક્રેડિટ કાર્ડ શરૂ કર્યા છે.