18 May, 2022 01:23 PM IST | Mumbai | Gujarati Mid-day Correspondent
રેફરીને લાફો મારવા બદલ કુસ્તીબાજ આજીવન સસ્પેન્ડ
સર્વિસિસના રેસલર સતેન્દર મલિકે અહીં કૉમનવેલ્થ ગેમ્સની ટ્રાયલ દરમ્યાન ૧૨૫ કિલો વર્ગની ફાઇનલમાં પરાજિત થયા બાદ રેફરી જગબીર સિંહને લાફો માર્યો એ બદલ સતેન્દર પર નૅશનલ ફેડરેશને આજીવન પ્રતિબંધ મૂકી દીધો છે. સતેન્દર મુકાબલામાં ૩-૦થી આગળ હતો અને ૧૮ સેકન્ડ બાકી હતી. મોહિતે સતેન્દર સામે બે પૉઇન્ટનો દાવો કર્યો, પરંતુ રેફરી વીરેન્દર મલિકે મોહિતને એક જ પૉઇન્ટ આપ્યો હતો.
મોહિત ઉશ્કેરાયો અને તેણે આ નિર્ણયને પડકાર્યો હતો. બીજા રેફરી જગબીર સિંહે ટીવી-રિપ્લે પરથી મોહિતને ત્રણ પૉઇન્ટનો હકદાર બતાવતાં સ્કોર ૩-૩થી બરાબરીમાં થયા બાદ છેવટે મોહિતને છેલ્લા પૉઇન્ટના આધારે વિજેતા જાહેર કરાયો હતો. એ વખતે સતેન્દરનો પિત્તો ગયો હતો, તે રેફરી જગબીર પાસે ગયો, તેમને ગાળ આપી અને પછી તેમને લાફો મારતાં રેફરી નીચે પડી ગયા હતા.