24 January, 2022 12:45 PM IST | New Delhi | Gujarati Mid-day Correspondent
સિંધુ
બે વાર ઑલિમ્પિક્સ મેડલ જીતી ચૂકેલી ભારતની ભૂતપૂર્વ વર્લ્ડ ચૅમ્પિયન બૅડ્મિન્ટન ખેલાડી પી. વી. સિંધુએ ગઈ કાલે લખનઉમાં સૈયદ મોદી ઇન્ટરનેશનલ ટુર્નામેન્ટની ફાઇનલ આસાનીથી જીતીને બીજી વાર આ સ્પર્ધાનું ટાઇટલ જીતી લીધું હતું. તેણે ફક્ત ૩૫ મિનિટ સુધી ચાલેલી વન-સાઇડેડ ફાઇનલમાં ભારતની જ માલવિકા બાંસોદને ૨૧-૧૩, ૨૧-૧૬થી હરાવી દીધી હતી. સિંધુ આ પહેલાં ૨૦૧૭માં આ સ્પર્ધામાં ચૅમ્પિયન બની હતી.
સિંધુ બે વર્ષ, ચાર મહિના અને ૨૯ દિવસ બાદ ફરી ટાઇટલ જીતી છે. એ પહેલાં, મિક્સ્ડ-ડબલ્સમાં ભારતનાં ઇશાન ભટનાગર અને તનિશા ક્રાસ્ટોની જોડીઅે ફાઇનલમાં ભારતનાં જ ટી. હેમા નગેન્દ્ર બાબુ તથા શ્રીવૈદ્ય ગુરાઝાદાની જોડીને ૨૧-૧૬, ૨૧-૧૨થી હરાવીને ટ્રોફી જીતી લીધી હતી.
પુરુષોમાં ઓર્નલ્ડ મર્કલ અને લુકાસ ક્લેરબાઉટમાંથી અેક જણ કોવિડ-પૉઝિટિવ જાહેર થતાં તેમની વચ્ચેની ફાઇનલ નો મૅચ’ ઘોષિત કરાઈ હતી.