ભારત માટે સૌથી વધુ ૪૧૩ હૉકી મૅચ રમનાર ખેલાડી બન્યો મનપ્રીત સિંહ

હૉકી ઇન્ડિયાએ કરી ૧૦ લાખ રૂપિયા પુરસ્કાર રૂપે આપવાની જાહેરાત

હૉકી ઇન્ડિયાએ ૪૧૩ નંબરની સ્પેશ્યલ જર્સી આપીને મનપ્રીત સિંહને સન્માનિત કર્યો

ભારતીય હૉકી ટીમના ૩૩ વર્ષના મિડફીલ્ડર મનપ્રીત સિંહે ભારત માટે સૌથી વધુ ઇન્ટરનૅશનલ હૉકી મૅચ રમવાનો રેકૉર્ડ કર્યો છે. પંજાબના મનપ્રીત સિંહે ભારતના ભૂતપૂર્વ કૅપ્ટન એવા ઓડિશાના દિલીપ તિર્કીનો ૪૧૨ મૅચ રમવાનો રેકૉર્ડ તોડ્યો હતો.

વિશ્વમાં સૌથી વધુ ઇન્ટરનૅશનલ હૉકી મૅચ રમનાર ખેલાડીઓમાં મનપ્રીત સિંહ પાંચમા ક્રમે પહોંચ્યો છે. ૪૦૦ કે તેથી વધુ મૅચ રમનાર ખેલાડીઓમાં તે એકમાત્ર ઍક્ટિવ પ્લેયર છે. હૉકી ઇન્ડિયાએ આ સિદ્ધિ બદલ તેને ૧૦ લાખ રૂપિયાના પુરસ્કારથી સન્માનિત કરવાની જાહેરાત કરી છે.

ભારતીય મેન્સ ટીમ હાલમાં નેધરલૅન્ડ્સ અને ઇંગ્લૅન્ડમાં પ્રો લીગ રમી રહી છે. પહેલી મૅચમાં ભારત સામે નેધરલૅન્ડ્સે ૩-૨થી જીત નોંધાવી હતી. બુધવારે મોડી રાતે જર્મની સામે શરૂ થયેલી મૅચમાં ભારતે ૩-૧થી બાજી મારી હતી.