20 September, 2026 10:06 AM IST | Mumbai | Gujarati Mid-day Correspondent
ક્વિમ્સી ડિસોઝા
એશિયન ગેમ્સમાં ટેકબૉલ મહિલા સિંગલ્સની સેમી-ફાઇનલમાં ભારતની ક્વિમ્સી ડિસોઝા ફાઇનલમાં પહોંચવાની એકદમ નજીક આવીને ચૂકી ગઈ હતી. શનિવારે રમાયેલા રોમાંચક અને સંઘર્ષપૂર્ણ મુકાબલામાં ઇન્ડોનેશિયાની સુમાયાએ શાનદાર વાપસી કરીને ક્વિમ્સીને ૧૨-૭, ૯-૧૨, ૭-૧૨થી પરાજય આપ્યો હતો. જોકે સેમી-ફાઇનલમાં હાર છતાં ક્વિમ્સીનું મેડલ જીતવાનું સપનું હજુ જીવંત છે અને તે હવે બ્રૉન્ઝ મેડલ માટેના મુકાબલામાં મેદાનમાં ઊતરશે.
નોંધનીય છે કે એશિયન ગેમ્સના ઇતિહાસમાં પ્રથમ વખત ટેકબૉલ (Teqball) રમતનો સમાવેશ કરવામાં આવ્યો છે, જ્યાં ભારતીય ખેલાડીએ સેમી-ફાઇનલ સુધી પહોંચીને પ્રભાવશાળી પ્રદર્શન કર્યું છે.
ક્વિમ્સીએ મૅચની શરૂઆત શાનદાર રીતે કરી હતી અને પ્રથમ ગેમ ૧૨-૭થી પોતાના નામે કરીને પ્રારંભિક લીડ મેળવી લીધી હતી. ઇન્ડોનેશિયાની પ્રતિસ્પર્ધી સુમાયાએ બીજી ગેમમાં લડાયક રમત દાખવીને ૯-૧૨થી જીત મેળવીને મૅચ ૧-૧ની બરાબરી પર લાવી દીધી હતી.
ત્રીજી અને નિર્ણાયક ગેમમાં પણ સુમાયાએ દબદબો જાળવી રાખતાં ક્વિમ્સી ૭-૧૨થી પાછળ રહી ગઈ હતી અને ત્રણ ગેમના સંઘર્ષ બાદ મૅચ ગુમાવી બેઠી હતી.
