30 September, 2026 01:14 PM IST | Nagoya | Gujarati Mid-day Correspondent
નીરુ ઢાંડા
એશિયન ગેમ્સની મહિલાઓની ટ્રૅપ શૂટિંગની વ્યક્તિગત સ્પર્ધાનો ખિતાબ જીતનાર શૂટર નીરુ ઢાંડા પ્રથમ ભારતીય શૂટર બની છે. હરિયાણાની ૨૬ વર્ષની નીરુએ રેકૉર્ડ-બ્રેકિંગ ૨૮ના સ્કોર સાથે ઐતિહાસિક મેડલ મેળવ્યો હતો. આ પહેલાં કોઈ પણ ભારતીય મહિલા ટ્રૅપ શૂટરે એશિયન ગેમ્સમાં વ્યક્તિગત મેડલ જીત્યો નહોતો.
આ રમતમાં શૂટર્સે શૉટગન દ્વારા હવામાં છોડવામાં આવતી માટીની ડિસ્કને તોડવાની હોય છે. દરેક રાઉન્ડમાં પચીસ ટાર્ગેટ્સ હોય છે અને ખેલાડીના હિટ્સ પ્રમાણે સ્કોર મળે છે.
એશિયન ગેમ્સ 2026માં ભારત માટે આ પ્રથમ વ્યક્તિગત ગોલ્ડ મેડલ હતો. જપાનમાં ભારતના અગાઉના ૪ ગોલ્ડ મેડલ ટીમ અથવા મિક્સ્ડ-ટીમ સ્પર્ધાઓમાં આવ્યા છે.
ગોલ્ડ જીત્યા પછી નીરુએ કહ્યું, ‘હું આ મેડલ ભારતીય સેનાના એ જવાનોને સમર્પિત કરું છું જેઓ દેશની રક્ષાનું મહત્ત્વપૂર્ણ કાર્ય કરે છે અને સ્વર્ગસ્થ રાજા રણધીર સિંહને પણ જેમણે ૧૯૭૮માં એશિયન ગેમ્સમાં ભારત માટે પ્રથમ ટ્રૅપ ગોલ્ડ મેડલ જીત્યો હતો.’
એશિયન ગેમ્સના માત્ર ૧૦ દિવસ પહેલાં નીરુને ગંભીર ફ્લુ (શક્યતઃ H1N1)ને કારણે ભોપાલમાં ટ્રેઇનિંગ સેન્ટર પાસે હૉસ્પિટલમાં દાખલ કરવામાં આવી હતી અને તે પાંચ દિવસ સુધી કંઈ પણ ખાઈ કે પી શકી નહોતી. તેની સહભાગિતા અને ફૉર્મ વિશે અનિશ્ચિતતા હતી, પરંતુ આ શૂટરે અડગ વિશ્વાસ સાથે શૂટિંગ-રૅન્જમાં સ્વસ્થ થઈને વાપસી કરી હતી. એશિયન ગેમ્સમાં મેડલ જીતવા પહેલાં તે ૨૦૨૫ની એશિયન ચૅમ્પિયનશિપમાં બે ગોલ્ડ મેડલ અને ૨૦૨૬ના વર્લ્ડ કપમાં ગોલ્ડ અને બ્રૉન્ઝ મેડલ જીતી હતી.
