19 November, 2021 06:53 PM IST | mumbai | Gujarati Mid-day Correspondent
પાકિસ્તાન-બંગલાદેશની આજે ઢાકામાં પ્રથમ ટી20
પાકિસ્તાન અને બંગલા દેશ વચ્ચે આજે ઢાકાના મીરપુરમાં ત્રણ મૅચવાળી ટી૨૦ સિરીઝની પ્રથમ મૅચ (બપોરે ૧.૩૦થી) રમાશે. પાકિસ્તાને આ મૅચ માટેની ટીમમાંથી સ્પિનર ઇમાદ વસીમ અને હાર્ડ-હિટર આસિફ અલીને આરામ આપ્યો છે. જોકે હૈદર અલી, ખુશદિલ શાહ અને મોહમ્મદ નવાઝમાંથી કોઈકને આજે રમવા મળી શકશે.
પાકિસ્તાન તાજેતરના ટી૨૦ વર્લ્ડ કપમાં સેમી ફાઇનલ સુધી પહોંચ્યું હોવાથી પોતાની તાકાતનો પરચો બંગલા દેશને કરાવવા ઉત્સુક હશે, જ્યારે બંગલા દેશ વર્લ્ડ કપની પાંચેપાંચ મૅચ હાર્યું હોવાથી આ સિરીઝમાં પાકિસ્તાનને હરાવીને પોતાની આબરૂ પાછી મેળવવાનો પ્રયત્ન કરશે. ઘરઆંગણે બંગલાદેશીઓ સારું એવું પ્રભુત્વ જમાવી શકતા હોવાથી બાબર આઝમની ટીમ એનાથી જરૂર ચેતશે. જોકે બાબર ઉપરાંત મોહમ્મદ રિઝવાન અને ફખર ઝમાનની બૅટિંગથી બંગલાદેશી બોલરોએ ખાસ ચેતવું પડશે.
બંગલા દેશ છેલ્લે ઘરઆંગણે (૨૦૧૫માં અને ૨૦૧૬માં) પાકિસ્તાન સામેની બન્ને ટી૨૦ જીત્યું હતું. બંગલા દેશનો કૅપ્ટન-બૅટર મહમુદુલ્લાને ટી૨૦ ઇન્ટરનૅશનલમાં ૨૦૦૦ રન પૂરા કરનાર પ્રથમ બંગલાદેશી બનવા માટે માત્ર ૬૦ રનની જરૂર છે.
Photo - પાકિસ્તાનના ફાસ્ટ બોલર શાહીન આફ્રિદીએ ડેબ્યુ પછીનાં પોણાચાર વર્ષમાં ૬૧માંથી ૨૦ ઇનિંગ્સની પહેલી ઓવરમાં એક કે એનાથી વધુ વિકેટ લીધી છે.