24 August, 2026 01:59 PM IST | Colombo | Gujarati Mid-day Correspondent
દેવદત્ત પડિક્કલે ૧૯૩ બૉલમાં ૧૨ ફોરની મદદથી ૧૧૭ રન કર્યા હતા
શ્રીલંકા સામે પહેલી મૅચ જીત્યા પછી ટીમ ઇન્ડિયાએ કોલંબો ટેસ્ટ-મૅચની પણ શાનદાર શરૂઆત કરી છે. બે ટેસ્ટ-મૅચની સિરીઝમાં ૧-૦થી આગળ ટીમ ઇન્ડિયાએ ટૉસ જીતીને પહેલાં બૅટિંગ પસંદ કરી હતી. પહેલા દિવસના અંતે ૮૫ ઓવરની રમતમાં ભારતે પાંચ વિકેટ ગુમાવીને ૩૦૦ રન કર્યા હતા.
ભારતીય ઓપનર્સ કે.એલ. રાહુલે ૩૩ બૉલમાં ૧૮ રન અને યશસ્વી જાયસવાલે ૫૩ બૉલમાં ૪૫ રન કરીને સારી શરૂઆત અપાવી હતી. દેવદત્ત પડિક્કલે ૧૯૩ બૉલમાં ૧૨ ફોરની મદદથી ૧૧૭ રન કર્યા હતા. છેલ્લે ૨૦૧૮-’૧૯માં ચેતેશ્વર પુજારાએ ત્રીજા ક્રમે બૅટિંગ કરીને વિદેશી જમીન પર ઑસ્ટ્રેલિયા સામે બૅક-ટુ-બૅક ટેસ્ટ-મૅચમાં સદી નોંધાવી હતી. દેવદત્ત પડિક્કલે પહેલી ટેસ્ટ-મૅચમાં ૧૬૭ રન નોંધાવ્યા હતા.
કૅપ્ટન શુભમન ગિલે ૧૦૮ બૉલમાં ૬ ફોરની મદદથી ૫૦ રન કરીને ૩૦૦૦ ટેસ્ટ-રન પૂરા કર્યા હતા. રવીન્દ્ર જાડેજાએ ૮૩ બૉલમાં ૪ ફોરના આધારે ૪૩ રનનું યોગદાન આપ્યું હતું. ૧૫ બૉલમાં ત્રણ રન કરીને વિકેટકીપર-બૅટર રિષભ પંત રિટાયર્ડ હર્ટ થયો હતો. પુલ શૉર્ટ મારવા દરમ્યાન ડાબા હાથના કાંડામાં દુખાવો શરૂ થયો હતો.
શ્રીલંકા માટે ફાસ્ટ બોલર અસિથા ફર્નાન્ડોએ ૧૬ ઓવરમાં ૪૬ રન આપીને ૩ વિકેટ લીધી હતી. મીડિયમ ફાસ્ટ બોલર લાહિરુ કુમારા અને સ્પિનર કેશરા નુવંથાને એક-એક સફળતા મળી હતી.
શ્રીલંકાના ફાસ્ટ બોલર અસિથા ફર્નાન્ડોએ ભારતીય ઓપનર યશસ્વી જાયસવાલને બોલ્ડ કરીને ઉગ્ર ઉજવણી કરી હતી. આ ઉજવણીથી ઉશ્કેરાઈને યશસ્વી જાયસવાલે અસિથા ફર્નાન્ડોના ચહેરાની નજીક જઈને શાબ્દિક ઝઘડો શરૂ કર્યો હતો. શ્રીલંકાના ખેલાડીઓએ તેમને અલગ કરવા માટે દરમ્યાનગીરી કરીને પરિસ્થિતિને શાંત કરી હતી.
સ્પિનર સારાંશ જૈનને ગઈ કાલે અનુભવી સ્પિનર રવીન્દ્ર જાડેજાના હાથે ૩૨૦ નંબરની ડેબ્યુ ટેસ્ટ-કૅપ મળી હતી.૩૩ વર્ષ ૧૪૫ દિવસની ઉંમરે ભારત માટે ડેબ્યુ કરનાર સારાંશ જૈન મધ્ય પ્રદેશ માટે ડોમેસ્ટિક ક્રિકેટમાં શાનદાર પ્રદર્શન કરીને અહીં સુધી પહોંચ્યો છે.
સારાંશ જૈન ભારતનો ચોથો સૌથી મોટી ઉંમરવાળો ટેસ્ટ-ડેબ્યુ કરનાર ખેલાડીએ છે. રુસ્તમ જમશેદજીએ ૧૯૩૩માં ૪૧ વર્ષ ૨૭ દિવસે, સી. રામાસ્વામીએ ૧૯૩૬માં ૪૦ વર્ષ ૩૯ દિવસે, રૉબિન સિંહે ૧૯૯૮માં ૩૫ વર્ષ ૨૩ વર્ષની ઉંમરે ભારત માટે ટેસ્ટ-ડેબ્યુ કર્યું હતું.
મુરલી વિજય અને મોહમ્મદ શમી પછી સારાંશ જૈન ત્રીજો પ્લેયર છે જેણે IPLમાં રમવા પહેલાં જ ભારત માટે ડેબ્યુ કર્યું હોય.
વર્લ્ડ ટેસ્ટ ચૅમ્પિયનશિપમાં આટલી મૅચ રમનાર પહેલો ભારતીય બન્યો રવીન્દ્ર જાડેજા.
