રોહિતે સિરાજને મારી ટપલી : વીડિયો વાઇરલ

જયપુરમાં ભારતીય બૅટર્સ ૧૬૫ રનનો લક્ષ્યાંક ચેઝ કરી રહ્યા હતા ત્યારે ભારતીય ટીમના ડગઆઉટમાં એક હળવો બનાવ બન્યો હતો.

રોહિતે સિરાજને મારી ટપલી

બુધવારે જયપુરમાં ભારતીય બૅટર્સ ૧૬૫ રનનો લક્ષ્યાંક ચેઝ કરી રહ્યા હતા ત્યારે ભારતીય ટીમના ડગઆઉટમાં એક હળવો બનાવ બન્યો હતો જેને નેટિઝન્સે ગંભીર માની લેતાં એનો વિવાદ થયો હતો. હેડ-કોચ રાહુલ દ્રવિડની પાછળ બેઠેલો બોલર મોહમ્મદ સિરાજ જ્યારે એક વાતે કંઈક બોલ્યો ત્યારે તેની પાછળ બેઠેલા કૅપ્ટન રોહિત શર્માએ તેને માથાના પાછળના ભાગ પર હળવી થપાટ મારી હતી. આને બીજા શબ્દમાં ટપલી પણ કહી શકાય. જોકે રોહિતની ટપલી પછી સિરાજ હળવું હસ્યો હતો. એ જ વખતે કોચ દ્રવિડે પાછળ જોયું હતું અને પ્લેયરોને કંઈક કહ્યું હતું. આ ઘટનાનો વિડિયો વાઇરલ થતાં સિરાજ અને રોહિત પર જોક્સ અને મીમ્સ બનવાની શરૂઆત થઈ ગઈ હતી. કેટલાક નેટિઝન્સે આ ઘટનાને શરૂઆતની આઇપીએલમાં હરભજન સિંહે શ્રીસાન્તને થપ્પડ મારી હતી એ ઘટના સાથે સરખાવી હતી. જોકે બુધવારની ઘટના માત્ર એક હળવી મજાક હતી.