રિન્કુની કરીઅરનું બહુ સારી રીતે ઘડતર કરીશું: મૅક્લમ

કલકત્તાના હેડ-કોચ અને હવે તો ઇંગ્લૅન્ડની ટેસ્ટ-ટીમના હેડ-કોચ બની ગયેલા બ્રેન્ડન મૅક્લમે બુધવારે પત્રકારો સમક્ષ રિન્કુ સિંહની પ્રશંસા કરી હતી.

રિન્કુની કરીઅરનું બહુ સારી રીતે ઘડતર કરીશું

ડી. વાય. પાટીલ સ્ટેડિયમમાં બુધવારે લખનઉના ક્લિન્ટન ડિકૉક (અણનમ ૧૪૦, ૭૦ બૉલ, ૧૦ સિક્સર, ૧૦ ફોર) અને કે. એલ. રાહુલ (અણનમ ૬૮, ૫૧ બૉલ, ૪ સિક્સર, ૩ ફોર) વચ્ચેની વિક્રમજનક ૨૧૦ રનની અતૂટ ભાગીદારી બાદ કલકત્તાની ટીમ જોરદાર વળતી લડત આપ્યા બાદ ૮ વિકેટે ૨૦૮ રન બનાવવાની સાથે માત્ર બે રન માટે હારી ગઈ અને સ્પર્ધાની બહાર ફેંકાઈ ગઈ, પરંતુ એના પાંચ બૅટર્સમાંથી ૨૪ વર્ષના રિન્કુ સિંહ (૪૦ રન, ૧૫ બૉલ, ચાર સિક્સર, બે ફોર)નો પર્ફોર્મન્સ સૌથી વધુ ધ્યાનાકર્ષક હતો. જો એવિન લુઇસે અફલાતૂન કૅચ ન પકડ્યો હોત તો કલકત્તા જીતી જ ગયું હોત.
કલકત્તાના હેડ-કોચ અને હવે તો ઇંગ્લૅન્ડની ટેસ્ટ-ટીમના હેડ-કોચ બની ગયેલા બ્રેન્ડન મૅક્લમે બુધવારે પત્રકારો સમક્ષ રિન્કુ સિંહની પ્રશંસા કરતાં કહ્યું કે ‘રિન્કુ અકલ્પનીય બૅટર છે. આઇપીએલની આવનારી સીઝન્સમાં રિન્કુનો પર્ફોર્મન્સ સુધારવા અને તેની કરીઅરના ઘડતરની બાબતમાં અમે ખૂબ ધ્યાન આપીશું. તે પાંચ વર્ષથી આઇપીએલમાં છે, પરંતુ તેને બહુ ઓછું રમવા મળ્યું છે. જેટલું રમવા મળ્યું એમાં તેણે મોકો ઝડપીને સારું પર્ફોર્મ કરી દેખાડ્યું છે.’
બુધવારે ૨૧૧ રનનો લક્ષ્યાંક મેળવવા જતાં કલકત્તાના જે પાંચ બૅટર્સનાં મોટાં યોગદાન હતાં એમાં નીતિશ રાણા (૪૨ રન, બાવીસ બૉલ, નવ ફોર), કૅપ્ટન શ્રેયસ ઐયર (૫૦ રન, ૨૯ બૉલ, ત્રણ સિક્સર, ચાર ફોર), રિન્કુ સિંહ (૪૦ રન, ૧૫ બૉલ, ચાર સિક્સર, બે ફોર), સૅમ બિલિંગ્સ (૩૬ રન, ૨૪ બૉલ, ત્રણ સિક્સર, બે ફોર) અને સુનીલ નારાયણ અણનમ ૨૧, ૭ બૉલ, ત્રણ સિક્સર)નો સમાવેશ હતો. એક તબક્કે કલકત્તાને ૩૦ બૉલમાં ૭૭ રનની જરૂર હતી ત્યારે એના વિજયની જરાય આશા નહોતી. સૅમ બિલિંગ્સ અને આન્દ્રે રસેલની વિકેટ પડ્યા પછી તો કલકત્તાની જીત શક્ય હતી જ નહીં, પણ રિન્કુ સિંહ અને સુનીલ નારાયણે જોરદાર ફટકાબાજી કરીને ટીમને જીતની લગોલગ લાવી દીધી હતી, પરંતુ ૨૦મી ઓવરના પાંચમા બૉલમાં રિન્કુની અને છેલ્લા બૉલમાં ઉમેશ યાદવની વિકેટ પડતાં વિજય કલકત્તાના હાથમાંથી છીનવાઈ ગયો હતો.