સૈયદ મુસ્તાક અલીમાં સૌરાષ્ટ્ર અને દિલ્હીની સતત બીજી જીત

સૈયદ મુસ્તાક અલીમાં સૌરાષ્ટ્ર અને દિલ્હીની સતત બીજી જીત

ઇશાંત શર્મા

દેશમાં કોરોના બાદ શરૂ થયેલી પ્રથમ ડોમેસ્ટિક ટી૨૦ ટુર્નામેન્ટમાં દિલ્હી અને સૌરાષ્ટ્રએ સતત બીજી જીત મેળવીને પોતપોતાના ગ્રુપમાં ટૉપનું સ્થાન મેળવી લીધું હતું. ઇન્દોરમાં સૌરાષ્ટ્ર ટીમે સર્વિસીસ સામે પહેલી મૅચમાં ૩ વિકેટે વિજય મેળવ્યા બાદ ગઈ કાલે વિર્દભ સામે ૭૯ રનથી મસમોટી જીત મેળવી હતી. સૌરાષ્ટ્રની આ શાનદાર જીતના સ્ટાર હતા ઓપનર અવિ બારોટ, પ્રેરક માંકડ અને ચેતન સાકરિયા. બારોટ અને માંકડની હાફ સેન્ચુરીને જોરે સૌરાષ્ટ્રએ ૨૦ ઓવરમાં ૭ વિકેટે ૨૩૩ રન બનાવ્યા હતા. ચેતન સાકરિયાના ૧૧ રનમાં પાંચ વિકેટના તરખાટ સામે વિર્દભ ૨૦ ઓવરમાં ૭ વિકેટે ૧૬૦ રન જ બનાવી શક્યું હતું.
બીજી તરફ વાનખેડેમાં પહેલી મૅચમાં મુંબઈને હરાવ્યા બાદ દિલ્હીએ ગઈ કાલે આંધ્રને ૬ વિકેટે હરાવીને સતત બીજો વિજય મેળવ્યો હતો. પ્રદીપ સાંગવાન (૩૩ રનમાં ૩) અને ઇશાંત શર્મા (૧૭ રનમાં બે) સામે આંધ્ર પ્રદેશ ૨૦ ઓવરમાં ૯ વિકેટે ૧૨૪ રન જ બનાવી શક્યું હતું. દિલ્હીએ ૧૭ ઓવરમાં ૪ વિકેટે ૧૨૮ રન બનાવીને મૅચ ૬ વિકેટે જીતી લીધી હતી. શિખર ધવન પાંચ જ રન બનાવી શક્યો હતો.