30 March, 2026 05:22 PM IST | Mumbai | Gujarati Mid-day Online Correspondent
પ્રતીકાત્મક ફાઇલ તસવીર
મુંબઈમાં T20 વર્લ્ડ કપ સેમિફાઇનલ મૅચની ટિકિટોના કાળાબજારના કેસમાં પોલીસે વધુ એક આરોપીની ધરપકડ કરી છે. આ આરોપી મુંબઈનો ભૂતપૂર્વ અંડર-19 ક્રિકેટર બલવંત સિંહ સ્વરૂપ સિંહ સોઢા હોવાની જાણ થઈ છે અને હવે તેને ડીબી માર્ગ પોલીસે કસ્ટડીમાં લીધો છે. તે આ કેસમાં સાતમો આરોપી છે.
પોલીસના જણાવ્યા અનુસાર, 26 વર્ષીય બલવંત સિંહ સ્વરૂપ સિંહ સોઢા પર ભારત અને ઇંગ્લૅન્ડ વચ્ચેની T20 વર્લ્ડ કપ સેમિફાઇનલ મૅચની ટિકિટો મોંઘા ભાવે વેચવાનો આરોપ છે. તેણે કથિત રીતે રૂ. 25,000 પ્રતિ ટિકિટના ભાવે બે ટિકિટો વેચી હતી. પોલીસે તેનો મોબાઇલ ફોન જપ્ત કર્યો છે, અને તેમાં રહેલા ડેટાની તપાસ ટિકિટ ક્યાંથી આવી? તે શોધવા અને આ નેટવર્ક સાથે જોડાયેલા અન્ય વ્યક્તિઓને ઓળખવા માટે કરવામાં આવી રહી છે. અધિકારીઓના જણાવ્યા અનુસાર, "અમે આ રેકેટમાં અન્ય લિંક્સ શોધવા માટે કોલ ડિટેલ રેકોર્ડ્સની તપાસ કરી રહ્યા છીએ."
આ મહિનાની શરૂઆતમાં આ કેસ પ્રકાશમાં આવ્યો જ્યારે પોલીસને માહિતી મળી કે અમુક વ્યક્તિઓ વધુ પડતા ભાવે મૅચની ટિકિટો વેચી રહ્યા છે. આ ગુપ્ત માહિતીના આધારે, પોલીસે સંભવિત ખરીદદારો તરીકે પોતાની ઓળખ રજૂ કરીને સ્ટિંગ ઑપરેશન હાથ ધર્યું. આ કામગીરી દરમિયાન, આદિત્ય રાઓરાણેની વિલે પાર્લેની એક કૉફી શૉપમાંથી ધરપકડ કરવામાં આવી હતી, જ્યાં તેણે રૂ. 25,000 પ્રતિ ટિકિટ વેચવાની સંમતિ આપી હતી. પૂછપરછ દરમિયાન, રાઓરાણેએ ખુલાસો કર્યો કે તેણે સિદ્ધાર્થ સભાપતિ પાસેથી આ ટિકિટો ખરીદી હતી. પોલીસે રાઓરાણેને સભાપતિ પાસેથી વધારાની ટિકિટો માગવાની સૂચના આપી હતી. ત્યારબાદ, સભાપતિએ બીજા સહયોગી મેઘન સંદીપ પ્રધાન દ્વારા વધુ બે ટિકિટો મોકલી, જેની આગળ તે જ સ્થળેથી ધરપકડ કરવામાં આવી હતી. આ કામગીરી દરમિયાન કુલ ચાર ટિકિટો મળી આવી હતી.
પોલીસના જણાવ્યા અનુસાર, આરોપીઓ મફત અને સબસિડીવાળી ટિકિટો - જે મૂળ મુંબઈ ક્રિકેટ એસોસિએશન દ્વારા જાહેર કરવામાં આવી હતી તે મોંઘા ભાવે વેચવાના કાવતરામાં સામેલ હતા. આજની તારીખમાં, આ કેસના સંદર્ભમાં કુલ 24 ટિકિટો જપ્ત કરવામાં આવી છે. પોલીસે આ ટિકિટોના વિતરણ અંગે વિગતો મેળવવા માટે મુંબઈ ક્રિકેટ એસોસિએશનને પણ પત્ર લખ્યો છે. આ મામલે ભારતીય ન્યાય સંહિતા અને મહારાષ્ટ્ર પોલીસ અધિનિયમ હેઠળ કેસ નોંધવામાં આવ્યો છે. સોઢાની ધરપકડ પહેલા, અન્ય છ આરોપીઓને પણ કસ્ટડીમાં લેવામાં આવ્યા હતા. પોલીસે માહિતી આપી હતી કે આ રૅકેટના સમગ્ર નેટવર્કનો પર્દાફાશ કરવા અને અન્ય આરોપીઓને ઓળખવા માટે તપાસ ચાલુ છે.
