PBKS vs DC: પંજાબ ૨૦૧૪ પછીના પહેલા પ્લે-ઑફની તલાશમાં

જોકે દિલ્હીને રહીસહી આબરૂ બચાવવા આજે ધરમશાલામાં જીતવું જ છે

હિમાચલ પ્રદેશનું ધરમશાલા હોમ-ગ્રાઉન્ડ

૨૦૧૪માં કિંગ્સ ઇલેવન પંજાબ આઇપીએલના પ્લે-ઑફમાં પહોંચ્યું ત્યાર પછી નવા નામ સાથે રમી રહેલી પંજાબ કિંગ્સની ટીમ ક્યારેય લાસ્ટ-ફોરમાં નથી પહોંચી એટલે આ વખતે રહ્યોસહ્યો જે મોકો મળ્યો છે એ શિખર ધવનની ટીમ ગુમાવવા નથી માગતી. પૉઇન્ટ્સ-ટેબલમાં આઠમા નંબરની પંજાબની ટીમ માટે હિમાચલ પ્રદેશનું ધરમશાલા હોમ-ગ્રાઉન્ડ છે અને ત્યાં આજે એનો મુકાબલો દિલ્હી કૅપિટલ્સ સામે છે. દિલ્હીની ટીમ પ્લે-ઑફ માટેની રેસની બહાર થઈ ચૂકી હોવાથી આજની મૅચ માત્ર ઔપચારિકતા માટે, પરંતુ રહીસહી આબરૂ બચાવવા તેઓ રમશે.

10
ધરમશાલામાં આટલાં વર્ષે ફરી આઇપીએલની મૅચ રમાવાની છે. છેલ્લે ૨૦૧૩માં અહીં પંજાબ-મુંબઈની મૅચ રમાઈ હતી, જેમાં પંજાબ વતી રમનાર પાકિસ્તાનનો અઝહર મહમૂદ મૅન ઑફ ધ મૅચ બન્યો હતો.

4
દિલ્હીનો કૅપ્ટન વૉર્નર પંજાબના આટલા બોલર સામે ક્યારેય આઉટ નથી થયો અને એમાં અર્શદીપ, રાહુલ ચાહર, રિશી ધવન અને નૅથન એલિસનો સમાવેશ છે.

2
પંજાબ કિંગ્સની ટીમ ૨૦૧૫ની સાલ પછી માત્ર આટલી વાર ૧૪માંથી ૭ લીગ મૅચ જીતી શક્યું છે. આ વખતે એની ૧૨માંથી ૬ જીત અને ૬ હાર છે.

આઇપીએલ-૨૦૨૩માં કઈ ટીમ કેટલા પાણીમાં?
નંબર	ટીમ	મૅચ	જીત	હાર	પૉઇન્ટ	રનરેટ
૧	ગુજરાત	૧૩	૯	૪	૧૮	+૦.૮૩૫
૨	ચેન્નઈ	૧૩	૭	૫	૧૫	+૦.૩૮૧
૩	મુંબઈ	૧૨	૭	૫	૧૪	-૦.૧૧૭
‍૪	લખનઉ	૧૨	૬	૫	૧૩	+૦.૩૦૯
૫	બેંગ્લોર	૧૨	૬	૬	૧૨	+૦.૧૬૬
૬	રાજસ્થાન	૧૩	૬	૭	૧૨	+૦.૧૪૦
૭	કલકત્તા	૧૩	૬	૭	૧૨	-૦.૨૫૬
૮	પંજાબ	૧૨	૬	૬	૧૨	-૦.૨૬૮
૯	હૈદરાબાદ	૧૨	૪	૮	૮	-૦.૫૭૫
૧૦	દિલ્હી	૧૨	૪	૮	૮	-૦.૬૮૬
નોંધ ઃ તમામ આંકડા ગઈ કાલની મુંબઈ-લખનઉ મૅચ પહેલાંના છે.