14 February, 2019 04:25 PM IST |
હૉટસ્ટારે હટાવ્યો એપિસોડ
હાર્દિક પંડ્યાના મહિલાઓ વિશેના વિવાદિત નિવેદનનો વિવાદ વકરી રહ્યો છે. દેશભરમાં હાર્દિક પંડ્યાના આ નિવેદનનો વિરોધ થયા બાદ હવે હોટ સ્ટારે આખો એપિસોડ જ હટાવી લીધો છે. હાર્દિક પંડ્યા અને કે. એલ. રાહુલે ફિલ્મ મેકર કરણ જોહરના ચેટ શો કૉફી વીથ કરણ 6માં વિવાદિત નિવેદન આપ્યું હતું. જેને પગલે સોશિયલ મીડિયામાં પણ બંને ટ્રોલ થયા હતા.
વિવાદ વકર્યા બાદ હોટસ્ટારે આ એપિસોડ હટાવવાનો નિર્ણય લીધો છે. ઉલ્લેખનીય છે કે બીજી તરફ ટીમ ઈન્ડિયાના કેપ્ટન વિરાટ કોહલીએ પણ બંને પ્લેયર્સને રમાડવા કે નહીં તેનો નિર્ણય COA પર છોડ્યો છે. તો બીજી તરફ ડાયના એડલજીએ બંને ખેલાડીઓ પર પ્રતિબંધ માટે લીગલ સેલની સલાહ માગી છે.
વિવાદ વકર્યા બાદ ક્રિકેટર હાર્દિક પંડ્યાએ ઈન્સ્ટાગ્રામ પર પોસ્ટ કરીને માફી માગી હતી. હાર્દિક પંડ્યાએ લખ્યું હતું, 'કૉફી વીથ કરણમાં મારા નિવેદન બાદ મેં જેનું જેનું દિલ દુભવ્યું છે તે હું તમામની માફી માગું છું. પ્રામાણિક્તાથી કહું તો શોના અંદાજને જોતા હું થોડો ખુલી ગયો હતો. હું કોઈની બેઈજ્જતી કરવા નહોતો ઈચ્છતો, કે કોઈની ભાવનાઓને દુઃખ પહોંચાડવા નથી ઈચ્છતો.'