રવિ શાસ્ત્રીની પાર્ટીમાં જૂના ધુરંધરોનું મિલન

મુંબઈમાં ગઈ કાલની મૅચ નિહાળતાં પહેલાં તે ઈડન ગાર્ડન્સમાં કલકત્તા-રાજસ્થાનની મૅચ જોવા પણ ગયા હતા.

સુનીલ ગાવસકરે ગઈ કાલે રવિ શાસ્ત્રીની પાર્ટીમાંથી એક શાનદાર ફોટો શૅર કર્યો

ભારતના ભૂતપૂર્વ ક્રિકેટ સુનીલ ગાવસકરે ગઈ કાલે રવિ શાસ્ત્રીની પાર્ટીમાંથી એક શાનદાર ફોટો શૅર કર્યો હતો. ઑસ્ટ્રેલિયાના ઍલન બૉર્ડર અને ભારતના સચિન તેન્ડુલકર સાથેની મુલાકાતનો ફોટો શૅર કરીને તેમણે લખ્યું, ‘રવિ શાસ્ત્રીની પાર્ટીમાં AB (ઍલન બૉર્ડર) અને વન ઍન્ડ ઓન્લી SRT (સચિન રમેશ તેન્ડુલકર)ને મળીને આનંદ થયો.’ ઑસ્ટ્રેલિયા અને ભારત વચ્ચે બૉર્ડર-ગાવસકર ટ્રોફીના નામે રમાતી ટેસ્ટ-સિરીઝમાં સચિન તેન્ડુલકર ૩૪  મૅચમાં ૩૨૬૨ રન સાથે હજી પણ નંબર વન બૅટર છે. ઑસ્ટ્રેલિયા માટે ૪૨૯  મૅચોમાં ૩૦  સદી અને ૧૦૨ ફિફટીના આધારે ૧૭,૬૯૮ રન કરનાર ભૂતપૂર્વ મિડલ-ઑર્ડર બૅટર ઍલન બૉર્ડર હાલમાં IPL મૅચ જોવાનું આમંત્રણ મળ્યું હોવાથી ભારતમાં છે. મુંબઈમાં ગઈ કાલની મૅચ નિહાળતાં પહેલાં તે ઈડન ગાર્ડન્સમાં કલકત્તા-રાજસ્થાનની મૅચ જોવા પણ ગયા હતા.